Հայաստանում տնտեսական ակտիվության ցուցանիշն այս տարվա առաջին կիսամյակում, նախորդ տարվա նույն ժամանակահատվածի համեմատ, կազմել է 7․9 տոկոս։ Այդ թվում՝ արդյունաբերության ոլորտում աճը կազմել է 10․8 տոկոս, շինարարություն աճել է 24․5 տոկոսով, ծառայությունների ոլորտում աճը կազմել է 11 տոկոս։ Այս ցուցանիշներն այսօր հրապարակել է ՀՀ Վիճակագրական կոմիտեն։
Զուգահեռ Պետական եկամուտների կոմիտեն հրապարակել է 2026 թվականի առաջին կիսամյակի ընթացքում առաջին 1000 խոշոր հարկ վճարողների կողմից վճարված հարկերի եւ վճարների վերաբերյալ տեղեկատվությունը։ Ըստ այդմ՝ 1000 խոշոր հարկ վճարողների կողմից 2026 թվականի հունվար-հունիս ամիսների ընթացքում պետական բյուջե, ընդհանուր առմամբ, վճարվել է ավելի քան 1 տրիլիոն 111 միլիարդ 163 միլիոն դրամ։ Պետական բյուջե է մուտքագրվել նախորդ տարվա նույն ցուցանիշից ավելի 125 միլիարդ 92 միլիոն դրամ․ նախորդ տարվա նույն ցուցանիշը կազմել է ավելի քան 986 միլիարդ 71 միլիոն դրամ։
Տնտեսագիտության դոկտոր Կարեն Սարգսյանը «Առավոտ»-ի հետ զրույցում անդրադարձավ հարցին, թե որքանո՞վ է հարկային եկամուտների աճը համահունչ տնտեսական աճին, եւ ի՞նչ միտումներ են նկատվում հայաստանյան տնտեսությունում։ «Խոշոր հարկատուների վճարած հարկերի աճը մոտ 9 տոկոս է, դա մոտավորապես համահունչ է Հայաստանում արձանագրվող տնտեսական աճին»,- ասաց Կարեն Սարգսյանը։
«Երբ դիտարկում ենք տնտեսական աճը, հիմնական առաջատար ոլորտները հանդիսանում են շինարարության, հանքարդյունաբերության ոլորտները, որոնք բավականին մեծ հարկեր են գեներացրել։ Նաեւ աշխատատեղերի ավելացում է տեղի ունեցել, դրա հաշվին ավել եկամտահարկ է վճարվել։ Այս ամենի արդյունքում նաեւ խոշոր հարկատուների մոտ է վճարած հարկերի ավելացում տեղի ունեցել։ Իսկ խոշոր հարկատուների ցանկում ներառված են հանքարդյունաբերության ոլորտի ընկերություններ, կապի օպերատորներ, առեւտրային ընկերություններ։ Այսինքն՝ խոշոր հարկատուների վճարած հարկերի աճը մոտ 9 տոկոս է, դա մոտավորապես համահունչ է Հայաստանում արձանագրվող տնտեսական աճին։ Սա միանգամայն տրամաբանական է Հայաստանի ընդհանուր տնտեսական աճի համատեքստում»,- ասաց Կարեն Սարգսյանը։
Կարդացեք նաև
Ըստ նրա՝ այս ցուցանիշները փաստում են, որ ներքին տնտեսության մեջ բավականին դինամիկ զարգացում է տեղի ունենում։ Չնայած արտահանման ծավալներն այս տարվա առաջին կիսամյակում նվազել են 6․7 տոկոսով, բայց ներքին տնտեսական ռեսուրսների հաշվին ՀՀ-ն 7․9 տոկոսանոց տնտեսական աճ ունի։ «Սա նույնիսկ կարելի է ասել՝ գերազանց ցուցանիշ է՝ հաշվի առնելով, թե տարածաշրջանի աշխարհաքաղաքական իրավիճակը, թե Հայաստանի արտահանման ոլորտում ծագած խնդիրները»,- հավելեց մեր զրուցակիցը։
Ռոզա ՀՈՎՀԱՆՆԻՍՅԱՆ
Լուսանկարը՝ Կարեն Սարգսյանի ֆեյսբուքյան էջից
