Ներքին գործերի նախարար Արփինե Սարգսյանը «ՍիվիլՆեթ»-ին տված հարցազրույցում, պատասխանելով հարցին, թե վիզաների ազատականացումը ի՞նչ գլխավոր ինստիտուցիոնալ փոխակերպում է բերելու Հայաստանի պետական կառավարման համակարգ, նշել է.
«Վիզաների ազատականացման գործընթացը Հայաստանի համար շատ ավելին է, քան պարզապես առանց վիզայի տեղաշարժի հնարավորությունը։ Այն պետք է դիտարկել ոչ միայն որպես ազատ տեղաշարժի հնարավորություն, այլև որպես պետական ինստիտուտների որակական վերափոխման կարևոր գործիք, որը երկարաժամկետ ազդեցություն է ունենալու Հայաստանի կառավարման համակարգի, հանրային ծառայությունների որակի և քաղաքացիների իրավունքների պաշտպանության մակարդակի վրա։
Ինչպես ճիշտ նշեցիք, ՀՀ-ԵՄ վիզաների ազատականացման գործողությունների ծրագիրը պետական կառավարման համակարգի համապատասխան ոլորտների արդիականացման և եվրոպական չափանիշներին մոտարկման ծավալուն նախագիծ է։ Դրա իրականացումը հանգեցնելու է խորքային ինստիտուցիոնալ վերափոխումների՝ ոլորտային օրենսդրության կատարելագործումից մինչև պետական մարմինների գործառնական կարողությունների հզորացում և կառավարման նոր մշակույթի ձևավորում։
Գործողությունների ծրագրով նախանշված են նաև այդ փոխակերպումների իրականացման ձևն ու ճանապարհը՝ մեզ համար միանգամայն ընդունելի տրամաբանությամբ։ Մասնավորապես՝ նույնականացված են առկա խոցելիությունները, բարելավման կամ բարեփոխման կարիք ունեցող գործընթացները, ինչպես նաև օրենսդրական և ինստիտուցիոնալ բացերը։
Կարդացեք նաև
Միաժամանակ կան նաև հենանիշներ, որոնց ուղղությամբ առանձնապես ծավալուն աշխատանք չի պահանջվի, քանի որ դրանց մի մասն արդեն իրականացվել է, իսկ գործող կառուցակարգերը հիմնականում համապատասխանում են սահմանված նպատակներին»։
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅՈՒՆ
ՀԱՆՐԱՅԻՆ ՀԱՂՈՐԴԱԿՑՈՒԹՅԱՆ ԵՎ ԻՐԱԶԵԿՄԱՆ ՎԱՐՉՈՒԹՅՈՒՆ
