«Ապառաժ» – Նիկոլ Փաշինյանի հայտարարության համաձայն՝ «խաղաղությունն անշրջելի դարձնելու համար անհրաժեշտություն է «Լեռնային Ղարաբաղի հայերի վերադարձի» իրավունքի մասին խոսույթը չշարունակելը»։
Արդյո՞ք վերադարձի իրավունքի մասին խոսելուց հրաժարվելը չի նշանակում նաև Արցախի ժողովրդի՝ իր մշակութային և պատմական ժառանգության նկատմամբ ունեցած իրավունքների անտեսում։ «Ապառաժ»-ի հետ զրույցում «Արցախի զբոսաշրջության և մշակույթի զարգացման գործակալություն» հասարակական կազմակերպության նախագահ Սերգեյ Շահվերդյանը հարցի շուրջ նշել է․
«Արցախցիների վերադարձի իրավունքը, որն ամրագրված է միջազգային դատարանների տարբեր որոշումներում, նաև ենթադրում է, որ արցախցիները պետք է հնարավորություն ունենան իրացնելու և պահպանելու իրենց մշակութային ժառանգությունը։ Մերժելով վերադարձի իրավունքը՝ փաստացի մերժվում է նաև մշակութային ժառանգության պահպանման և իրացման իրավունքը։
Միևնույն ժամանակ, վերադարձի իրավունքի մերժմամբ մոռացության է մատնվում այն հսկայական մշակութային ժառանգությունը, որը ձևավորվել, ստեղծվել և պահպանվել է Արցախում՝ Արցախի բնիկ ժողովրդի կողմից»։
