«Որպես ՀՀ քաղաքացի՝ ուզում եմ շնորհակալություն հայտնել դատաիրավական համակարգի այն անձանց, որոնք այս ամենը ի ցույց են դրել հանրությանը՝ իրավական տեսանկյունից»,- այսօր լրագրողների հետ ճեպազրույցում ասաց Նիկոլ Փաշինյանը՝ անդրադառնալով Քոչարյաններին առնչվող քրեական գործերին:
«Բա այս փաստերի հետ ութ տարի, չէ, 17-18 տարի, ՀՀ իրավապահ մարմինները ո՞նց են առնչվել։ Այն դատախազներն ու քննիչները, որոնք այս փաստերի մասին իմացել են, ո՞նց են արձագանքել։
Մենք պետական ստանդարտ պետք է սահմանենք։ Եթե նույնիսկ չեն իմացել, 2018-ից անընդհատ բարձրաձայնվել է։ Դատախազներն ու քննիչներն ի՞նչ գործողություն են ձեռնարկել։
Ե՞ս եմ զանգել՝ ասեք՝ գործ հարուցեք, կամ ե՞ս եմ զանգել ՝ ասել՝ այդ գործերը քննեք։ Քոչարյանական մաֆիան իր շոշափուկներն ունեցել ու դեռևս ունի Հայաստանի դատաիրավական համակարգում։ Խուզարկությունից առաջ պաստառներ էին գրել։
Կարդացեք նաև
Պատմություն են սարքել, բա թե՝ երեխեքը… Բա եթե գիտեիք, որ գալու են, երեխեքին մյուս տատիկ-պապիկի տուն ինչի՞ չէիք ուղարկել։ Պահել էիք, որ երեխեքով շոո՞ւ անեիք։ Սա էլ ցույց է տալիս, որ երեխեքին զենքայնացնելու պրոցես է սկսվել։
Պետք է իրավապահ համակարգը բաց աչքով նայեր ու ասեր՝ Ռոբերտ Քոչարյանը, Սերժ Սարգսյանը, Գագիկ Ծառուկյանը վերին արտի ցորեննե՞ր են, կարող են թալանել ՀՀ-ն ու սերնդեսերունդ այդ թալանածը ժառանգե՞ն։
Ոչ մեկը հարցը չի տալիս՝ էդ միլիարդները Ռոբերտ Քոչարյանին որտեղի՞ց։ Ասում են՝ բիզնեսով ենք զբաղվել։ Ո՞ւմ են ձեռ առնում։ Իրենք ուժեղ բիզնեսմե՞ն են, մենք էլ չենք կարողանում ոչ մեկի ձեռքից բան խլել։
Եվ Քոչարյանը, և Գագիկ Ծառուկյանը ամսվա մեկը, որ մոտենա, հեռախոսը պետք է բացեն, տեսնեն՝ թոշակը նստե՞լ է, թե՞ ոչ։ Այ սա է քաղաքական խնդիրը։ Ինչո՞ւ, որովհետև պետք է ապրեն օրինական եկամուտներով ու իրենց թոշակով։
Ինչ ապօրինի ձեռք են բերել՝ կոպեկ առ կոպեկ, քյաբաբ առ քյաբաբ, պետք է վերադարձվի ՀՀ-ին ու նրա ժողովրդին։
Եթե սա տեղի չունենա, նշանակում է՝ նոր հեղափոխություն պետք է տեղի ունենա»։
Փաշինյանը հիշեց նաև նախկին գլխավոր դատախազին, այն դատախազներին ու քննիչներին, որոնց օրոք ու որոնց վարույթում են եղել Քոչարյաններին առնչվող գործերը և չեն արժանացել ընթացքի. «Պետք է բացատրություն տան ժողովրդին։ Նրանց բոլորի ունեցվածքները պետք է նայվեն, նրանց հաշվեհամարներն էլ պետք է նայվեն։
Կարո՞ղ է՝ փող եք առել, թե՞ ձեզ թվում է, որ ձեր հետևից եկող չի լինելու»:
Արփինե ՍԻՄՈՆՅԱՆ
