«Ես՝որպես տնտեսագետ, հեղինակություն եմ համարում Տիգրան Սարգսյանին, որպես դիվանագետ Շավարշ Քոչարյանին: Մեկ ամիս առաջ նրանք ասում էին, թե բացառված է ՀՀ-ի միացումը ՄՄ-ին: Նրանք մեր պետության կարևոր չինովնիկներն են և հայտարարեցին, որ մեր պետությունը կգնա և-և-ի ճանապարհով: Ո՞նց եղավ, որ մեկ ակնթարթում մի հատ մեծ «Մ» հայտնվեց, մի հատ պուճուր «և»: Սա էլ ռուսական բանակի առկայության արդյունքն է Հայաստանում, որ կարող են կանչել մեր նախագահին ու ասել, ընտրի՝ որն ես ընտրում»,-այսօր «Հայելի» ակումբում անդրադառնալով ՌԴ նախագահ Վլադիմիր Պուտինի այցին՝ այսպիսի կարծիք հայտնեց Գերագույն խորհրդի նախկին պատգամավոր Ազատ Արշակյանը:
Հակադարձելով ՀՀԿ խմբակցության պատգամավոր Սուքիաս Ավետիսյանը նշեց. «Ես միայն կարող եմ ոգևորությամբ ասել, որ 12 տարբեր պայմանագրեր կնքեցին մեր երկրի տնտեսական, այլ հիմնախնդիրների հետ կապված: Գյումրիում շատ փողոցներ նորոգվեցին, Գյումրին նորից կարգի բերվեց: Գյումրեցիները տարիներ շարունակ օգտվել են ռուսական կայազորի ներկայությունից, ուստի գյումրեցիների շրջանում ակնկալիք կար, որ առաջիկայում կայազորի թվաքանակի ավելանալու հետ մեկտեղ հնարավորություն կունենան աշխատել կայազորում»:
Տաթև ՀԱՐՈՒԹՅՈՒՆՅԱՆ
