Այսօր Վերաքննիչ քրեական դատարանում քննվեց Բուդաղյանների փաստաբան Հայկ Ալումյանի բողոքը՝ Արաբկիր Քանաքեռ -Զեյթուն վարչական շրջանների ընդհանուր իրավասության դատարանի կողմից իր բողոքների քննությունը կասեցնելու որոշման վերաբերյալ:
Հիշեցնենք, որ Արաբկիր Քանաքեռ -Զեյթուն վարչական շրջանների ընդհանուր իրավասության դատարանը կասեցնելու որոշում էր ընդունել՝ պատճառաբանելով, որ քրեական գործի նյութերը դատարան չներկայացնելու քննիչի որոշումը բողոքների քննության համար անհաղթահարելի ուժ է:
Վերաքննիչ քրեական դատարանում պարոն Ալումյանը ներկայացրեց իր բողոքի պատճառաբանությունները, մասնավորապես նշեց, որ քրեական դատավարության օրենսգիրքը նախատեսում է գործով վարույթի կասեցում, եւ չի նախատեսում գործի քննության կասեցում. «Եթե դատարանը գտնում է, որ անհնարին է առանց քրեական գործի նյութերի բողոքի քննություն, ապա ոչ թե բողոքի քննությունը պետք է կասեցներ, այլ քննիչից պահանջեր քրեական գործի նյութերը»:
Քննիչ Ալեքսան Ղազարյանը համաձայնեց, որ տեղի է ունեցել ոչ թե քրեական գործի վարույթի, այլ բողոքի քննության կասեցում, ու քննիչն էլ համաձայնեց, որ քրեական դատավարության օրենսգրքով նման ընթացակարգ նախատեսված չէ: Պարոն Ղազարյանը, սակայն, շարունակեց պնդել, որ գործի ամբողջ նյութերը դատարանին տրամադրելու նպատակահարմարություն չի տեսնում եւ որ ինքը չպետք է գործի նյութերը ներկայացնի, ինչը կրկին առարկեց պարոն Ալումյանը: Նա նաեւ հիշեցրեց, որ առաջին ատյանի դատարանը նույնպես համակարծիք էր, որ առանց ամբողջական նյութերի բողոքի օբյեկտիվ քննություն չի կարող լինել:
Կարդացեք նաև
Դատական հաջորդ նիստը նշանակվեց ապրիլի յոթին:
Արփինե ՍԻՄՈՆՅԱՆ
