Պաշտոնական տվյալներով, այս տարի ռուսական շուկայում արտահանվող հայկական ապրանքների քանակը նվազել է։ Դա անշուշտ տարբեր գործոնների հետեւանք է. մի կողմից կրճատվել է սպառողական պահանջարկը, մյուս կողմից՝ իրավիճակը բարենպաստ չէ տնտեսության ոլորտում։ Ռուսաստանի ֆինանսական շուկան եւս նպաստավոր չէ արտահանվող ապրանքների մրցունակության համար։ Ռուսական շուկա արտահանման ծավալների անկումը նաեւ հայկական որոշ գյուղմթերքների արտադրության կրճատման հետեւանք է։
Վիճակագրության ծառայության վերջին տվյալներով, տարեսկզբի յոթ ամիսներին հայկական արտահանումը Ռուսաստան կրճատվել է 6,1 տոկոսով։ Եթե հաշվի առնենք, որ օգոստոսի գրեթե ամբողջ կեսը անցակետը փակ մնաց, ապա կասկած չկա, որ միտումը պահպանվել է նաեւ այդ ամսին։
Ընդհանուր առմամբ յոթ ամսվա ընթացքում Հայաստանից ռուսական շուկա է տեղափոխվել շուրջ 164,7 մլն դոլարի ապրանք։ Նախորդ տարվա նույն ժամանակահատվածում արտահանումը հասնում էր 175,5 միլիոնի։
Չնայած գյուղմթերքների արտադրության պատկերը, հատկապես որոշ ոլորտներում, այս տարի Հայաստանում այնքան էլ լավ չէ, այնուհանդերձ կան մի շարք արտադրատեսակներ, որոնց հաշվին կարելի է բարելավել արտահանումը։ Մրգերից, բանջարեղենից, ինչպես նաեւ պահածոներից բացի պետք է փորձել շուկաներ գտնել նաեւ այլ արտադրատեսակների համար։ Օրերս արդեն մսամթերքի շուկայում գործող հայաստանյան արտադրողները հայտարարեցին ռուսական շուկա արտահանում կազմակերպելու հնարավորության մասին։ Մինչեւ վերջերս, Հայաստանից բացի, հայկական մսամթերքն իրացման չնչին շուկա ուներ միայն Վրաստանում։
Կարդացեք նաև
Եթե հաջողվի դիմանալ ռուսական շուկայի մրցակցությանը, ապա մսամթերքի արտահանման հաշվին եւս կարելի է ընդլայնել հայկական ապրանքների տեսականին ռուսական շուկայում։ Առավել եւս, որ այս ոլորտում գործող տեղական ձեռնարկությունների հզորությունները մեծ են։ Դրանք կարելի է կարճ ժամանակահատվածում ընդլայնել։
Վասակ ԹԱՐՓՈՇՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
