«Ես չեմ ուզում մտնել դրա մեջ`քառյակը եռյա՞կ կդառնա, թե՞ հնգյակ, բայց մեզ համար ձեռնտու է, որ քառյակը հենց այդպիսին էլ մնա: Նման աշխատանքը մեզ ավելի զգաստ է պահում»,- այսօր «Ազդակ» մամուլի ակումբում հայտարարեց ՀՀԿ-ական պատգամավոր Սուքիաս Ավետիսյանն`անդրադառնալով ՀԱԿ-ի, ԲՀԿ-ի եւ «Ժառանգության» համատեղ հանրահավաքին ՀՅԴ-ի չմասնակցության փաստին:
«Բայց երեկ քառյակի մեջ եռյակը որոշում է կայացրել: Հետաքրքիրն այն է, որ հանրահավաքին մասնակցելու է եռյակը, բայց հանդես է գալիս քառյակի անունից»,- շարունակեց բանախոսը`հավելելով, որ ՀՅԴ-ն միշտ խոսել է սահմանադրական բարեփոխումների մասին:
Aravot.am-ի հարցին ՀՅԴ-ի կողմից կամ ՀՅԴ-ին առաջարկ եղե՞լ է կոալիցիան դարձյալ համալրելու համար, Սուքիաս Ավետիսյանն ասաց, որ առաջարկներից տեղյակ չէ, բայց, առայժմ ՀՅԴ-ի հետ համագործակցությունը տեսանելի է սահմանադրական բարեփոխումների հարցում, թե հետագայում այլ ի՞նչ հարցերի շուրջ համագործակցելու հնարավորություններ կլինեն`չգիտի:
Իսկ ինչ վերաբերում է սահմանադրական բարեփոխումների վերաբերյալ «Ժառանգության» առաջարկներին, ՀՀԿ-ական պատգամավորը կարծիք հայտնեց, որ դրանց կարելի է անդրադառնալ՝ երբ հայեցակարգը լինի. «Բայց հետաքրքիր է`առանց սահմանադրական բարեփոխումների, իրենք ինչպե՞ս են պատկերացնում կառավարման համակարգի փոփոխությունը: Մեր Սահմանադրությամբ հստակ ֆիքսված է, որ կառավարման համակարգի փոփոխությունը միայն Սահմանադրության փոփոխությամբ է լինելու»:
Կարդացեք նաև
Այլ մանրամասները` տեսանյութում
Նելլի ԳՐԻԳՈՐՅԱՆ
