ԱԺ ՀՀԿ խմբակցության պատգամավոր Լևոն Մարտիրոսյանի կարծիքով՝ ՀՀ նախագահի մակարդակով Ադրբեջանին ռուսական կողմի զենքի վաճառքի վերաբերյալ մտահոգություն արտահայտելն ուղերձ էր Ռուսաստանին:
«Իհարկե, նրանց իրավունքն է ՝ ում եւ ինչքան զենք վաճառել, բայց իրավունք ունենք մեր մտահոգությունը արտահայտել որպես ստրատեգիական գործընկեր»,- «Հայելի» ակումբում ասաց Լեւոն Մարտիրոսյանը:
Ըստ նրա, Ռուսաստանը ՀԱՊԿ-ի կարեւոր մասն է, եւ Հայաստանի մտահոգությունները՝ Ռուսաստանին ուղղված, ուղղված էին նաեւ ՀԱՊԿ-ին:
«Ազատ դեմոկրատներ» կուսակցության փոխնախագահ Անուշ Սեդրակյանն էլ նկատեց, որ զենքի վաճառքի վերաբերյալ մտահոգությունը պաշտոնական մտահոգությունից ավելի վաղ էր հնչել. «Մինսկի անդամ երկրները որոշակի համաձայնություն են ստորագրել, որ չեն նպաստելու կոնֆլիկտի սրմանը, այդ թվում նաեւ զենքի վաճառքին, բայց զենքի վաճառքը հասել է 5 միլիարդի»:
Կարդացեք նաև
Նրա խոսքով, պետք է օգտագործել Ավետիսյանների ընտանիքի սպանությունը, զենքի վաճառքը ու Ռուսաստանին չտալ ռազմական երաշխիքներ. «Բայց մենք շարունակում ենք ձրի հատկացումներ տալ ռուսական ռազմաբազային, այն դեպքում, երբ նորմալ պայմանագրային հարաբերություններ չեն եղել, Հայաստանը միշտ տվել, տվել է, ստացել կոնկրետ դատական դեպքերի լրակցում, անվտանգության հարցերում ձեռք բերված խոստումների տապալում: Ռուսաստանը խախտում է ներքին գործընկերային հիմունքները»:
Անուշ Սեդրակյանը նաեւ անդրադարձավ Աստանայում ԵՏՄ անդամ պետությունների հավաքին Հայաստանին չհրավիրելու փաստին, ասաց՝ Հայաստանը ԵՏՄ-ում չի դիտարկվում որպես լիարժեք գործընկեր, այլապես թեկուզ արձանագրային հրավերք կստանար. «Ապրանքաշրջանառությունը ԵՏՄ-ի հետ հասել է զրոյական շեմին, որը ցույց է տալիս, որ չունենք այն նույնիսկ հնարավոր ակնկալիքը տնտեսական համագործակցության, որը մեզ խոստանում էին, հիմնական գործընկերը մնում է ԵՄ-ը»:
Արփինե ՍԻՄՈՆՅԱՆ
