Ծնեբեկը իր օգտակարությամբ, անկրկնելի համով եւ տարվա մեջ ընդամենը մեկ-երկու ամիս գոյությամբ նվաճել է իսկական դելիկատեսի համբավ: Եվ ապրիլ-մայիսին, քանի դեռ այդ հրաշք բույսը կա, հարկավոր է որքան հնարավոր է շատ ուտել դրանից՝ չափազանց օգտակար է: Այսօր կառաջարկեմ մի գեղեցիկ աղցան, որը շատ հարմար է տոնական սեղաններին, հյուրերին մատուցելու համար:
Անհրաժեշտ մթերքները
Ծնեբեկ- 2 կապ
Ապխտած միս կամ բեկոն – 50 գրամ՝ շատ բարակ կտրատած (եթե հնարավորություն ունեք՝ գնեք «պրոշուտո», այն ավելի հարմար է)
Աղցանի տերեւներ- 1-2 կապ (կարող եք վերցնել ինչպես հազարաթերթիկի տարբեր տեսակներ, այնպես էլ ռուկոլա, սպանախի մատղաշ տերեւներ եւ այլն)
Չերրի տեսակի լոլիկ- 6-7 հատ (կարող եք սովորական լոլիկով փոխարինել)
Պանիր ֆետա- 50 գրամ
Բալզամիկ քացախ-1-2 ճաշի գդալ
Ձիթապտղի յուղ- 2-3 ճաշի գդալ
Պատրաստման եղանակը
Կարդացեք նաև
Ծնեբեկը մաքրեք, այսինքն՝ ներքեւի հատվածի փայտային մասը կտրեք եւ դեն նետեք: Լավ լվացեք: Եռացող ջրի մեջ մեկ ճաշի գդալ աղ արեք եւ ծնեբեկը լցրեք մեջը: Թողեք եփվի ոչ ավելի քան 2 րոպե: Այդ ընթացքում պատրաստեք սառույցով լի աման: Հենց ծնեբեկը եփվի, անմիջապես հանեք ջրից եւ լցրեք սառույցով ամանի մեջ, որպեսզի եփը դադարի եւ ծնեբեկը չկորցնի իր շքեղ կանաչ գույնը:
Մատուցարանի մեջ լցրեք աղցանի տերեւները, ծնեբեկի կեսը, ձիթապտղի յուղ արեք վրան, խառնեք: Վրան գեղեցիկ շարեք երկու կես արած չերրի լոլիկները, խորանարդաձեւ կտրատած ֆետա պանիրը, մի քանի կտոր բեկոն:
Տաքացրեք գրիլ թավան: Երեք-չորս ծնեբեկը փնջեք, փաթաթեք բեկոնով: Մի քանի փունջ պատրաստեք եւ թավայի վրա ամեն կողմից 20-ական վայրկյանով տաքացրեք: Դրանք եւս դրեք աղցանի վրա:
Մատուցելուց անմիջապես առաջ աղցանը ցողեք բալզամիկ քացախով եւ մատուցեք:
Բարի ախորժակ:
Պատրաստման եղանակը մանրամասն եւ մի փոքր այլ ձեւով՝ տեսանյութում.
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
18.04.2015
