Այսօր գյումրեցի մի խումբ երիտասարդներ, դասախոսներ, տնտեսագետներ հոսանքի թանկացման դեմ իրենց բողոքը սկսեցին Գյումրու կենտրոնական Վարդանանց հրապարակից: Նրանք հրապարակում քննարկեցին ու որոշեցին, որ չեն վճարելու սպառած էլեկտրաէներգիայի դիմաց, քանի դեռ չեն կասեցրել թանկացման մասին որոշումը: Ըստ նրանց, եթե փորձեն որեւէ մեկին անհանգստացնել, հոսանքը մարել, ապա կսկսեն անհնազանդության ակցիաներ:
Այսպիսի որոշում ընդունելուց հետո նրանք հեծանիվներով, մեքենաներով ու ոտքով իրազեկման երթ անցկացրեցին քաղաքի կենտրոնական փողոցներով՝ հասնելով դեպի Շիրակի մարզպետարան: Երիտասարդները բացականչում էին՝ «Չենք մուծելու», «Մենք ենք տերը մեր երկրի»:
Այսպիսով նրանք փակեցին կենտրոնական փողոցները, Շիրակի մարզի ոստիկանները Սայաթ –Նովա փողոցի վրա եկան ու միացան բողոքավորներին: Այստեղ սկսվեց բախում ոստիկանների ու երթի մասնակիցների միջեւ: Ոստիկանները հրահանգում էին չփակել փողոցը, սակայն նկատենք, որ բախում հրահրողը Շիրակի մարզի վերանշանակված փոխոստիկանապետ Վահրամ Ենգոյանն էր, որը հասարակական կարգը պահպանելու փոխարեն, սկսեց վիրավորել տնտեսագետ Կարեն Պետրոսյանին: Փոխոստիկանապետը նրան դիմեց անհարգալից բառերով, որն էլ զայրույթի ալիք բարձրացրեց երթի մասնակիցների մոտ: Նրանք սկսեցին պատիվ պահանջել փոխոստիկանապետից՝ տնտեսագետ-դասախոսին թափթփուկ եւ այլ անհարգալից բառերով դիմելու համար:
Ինչեւէ, միջամտեցին ոստիկանության մյուս պաշտոնյաները, որոնք փորձեցին մեղմել իրավիճակը, հորդորեցին փողոցները չփակելով՝ շարունակել երթը: Այդ ընթացքում գյումրեցի երիտասարդներին հաջողվեց իրենց ասելիքը տեղ հասցնել. մարդիկ, լսելով բողոքավորների կոչերը, կախվում էին պատուհաններից, սրճարաններից ու սպասարկման օբյեկտներից դուրս էին գալիս՝ թափահարելով ձեռքերն ի նշան համաձայնության այն առաջարկի, որ արժե չվճարել: Բողոքավորները հասան Շիրակի մարզպետարանի շենքի մոտ, այն շրջափակել էին ոստիկանները:
Կարդացեք նաև
Այստեղից երթի մասնակիցները հետ դարձան դեպի Թատերական հրապարակ, որտեղ եւ որոշեցին վաղը վերսկսել բողոքի ակցիան ու հանդես եկան հայտարարությամբ:
Հայտարարության մեջ նրանք մասնավորապես ասացին, որ իրենք առաջարկում են ամբողջ քաղաքով սպառել ու չմուծել հոսանքի վարձը, բոլոր նրանք, ովքեր համաձայն են, վաղը թող գան ու միանան իրենց: Երթը ավարտվեց ծափահարություններով ու բացականչությամբ՝ «Չենք մուծելու, Ո՛չ թալանին»:
Նունե ԱՐԵՎՇԱՏՅԱՆ
Հալալ ա Գյումրեցիներին, շատ թասիբով մարդիկ են, եթե Հայաստանի բնակչության մեծ մասը նրանց նման մտածեր, հիմա Հայաստանը կլիներ ապահով և ոչ գաղջ երկիր: