«Պատերազմի վերսկսման վտանգ միշտ էլ կա»,- «Առավոտի» հետ զրույցում ասաց «Հայազն» կուսակցության վարչության անդամ Արմեն Աղայանը, ով օրերս է վերադարձել Արցախից: Այս օրերին սահմաններում կրկին լարվածություն է, ու տարածաշրջանային զարգացումների ֆոնին ԼՂ հարցը կարծես նորից առաջ է մղվում. որոշ վերլուծաբաններ չեն բացառում անգամ լայնածավալ պատերազմական գործողությունների վերսկսումը: Հակառակորդի ակտիվության մասով մեր զրուցակիցը նկատեց. «Կարծում եմ՝ հակառակորդի հերթական ակտիվացումը ավելի շատ պայմանավորված է երկու հանգամանքով` մեկը բանակցության հերթական փուլին ընդառաջ՝ ավանդական դարձած ճնշումն է հայկական կողմի եւ միջնորդների վրա, մյուսը` նավթի գնի անկմամբ պայմանավորված ճգնաժամից իրենց ժողովրդի ուշադրությունը շեղելը:
Սրանց կարելի է գումարել Ռուսաստանի ակտիվանալու փորձերը տարածաշրջանում եւ դրան խանգարելու արեւմտյան փորձերը, որոնք արցախյան բանակցություններում նորից օրակարգ են բերել խաղաղապահների խնդիրը: Սակայն գրեթե վստահ եմ, որ նման քննարկումները այս անգամ էլ անպտուղ կմնան»,- ասաց նա:
Արմեն Աղայանի հետ հարցազրույցը ներքաղաքական թեմաներով
«Առավոտ» օրաթերթ
31.07.2015
