Երեւանի Ավան և Նոր Նորք վարչական շրջանների ընդհանուր իրավասության դատարանում այսօր` մայիսի 26-ին, շարունակվեց ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործի քննությունը:
Հիշեցնենք, որ ըստ մեղադրական եզրակացության, Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը հունվարի 29-ին, ժամը 02:00-ից 03:00-ի սահմաններում, զորամասի առաջին գումարտակի առաջին մարտկոցի թիվ 408 ննջարանում առանձին դաժանությամբ, խուլիգանական դրդումներով սպանել են Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր Հայկազ Բարսեղյանն ինքնասպան է եղել: Այս գործով ամբաստանյալները դատարանում հայտարարել են, որ իրենց մեղավոր չեն ճանաչում:
Այսօրվա նիստի ընթացքում հարցաքննվեց Տիգրան Դեմիրճյանը: Գործում որպես տուժող ներգրավված զինվորական համազգեստով երիտասարդն ասաց, որ ճանաչում է ամբաստանյալներին, նրանց հետ եղել է նորմալ հարաբերությունների մեջ:
Դեմիրճյանն ասաց, որ դեպքի օրը պառկած է եղել Հայկազ Բարսեղյանի դիմացի մահճակալին, մասամբ լսել եւ տեսել է կատարվածը: Նա տեղեկացրեց, որ դեպքից առաջ ամբաստանյալները եւ սպանված կուրսանտը ճաշարանում են փորձել հարաբերություններ պարզել, ամբաստանյալից մեկն էլ ասել է, թե «դա այստեղ քննարկելու բան չի, վերեւը կխոսանք»:
Կարդացեք նաև
«Ձայները լսեցի, արթնացա, չորս հոգով սենյակում էին` Հ. Բարսեղյանի «պոլկի» մոտ էին հավաքված…Առավոտյան Սամվել Սերոբյանը գիտեր, թե մարդ կա Հայկազի տեղերի մեջ, բայց սպարտիվկա էր ծալած-դրած, իբր մարդ էր, բայց արյուն էր…Զեկուցեցինք այդ մասին, հետո Հայկազին գտանք սպորտհրապարակում…Դրանից հետո քննիչները եկան…»:
Դեմիրճյանը նշեց, որ ամբաստանյալները Հայկազին դուրս են տարել: Դեմիրճյանի տպավորությամբ` նա շարժումներ չէր անում եւ ձայն չէր հանում, ուստի ենթադրել է, որ նա կենդանի չէ: Իսկ մինչեւ Բարսեղյանին ննջասենյակից հանելը, Տիգրան Դեմիրճյանի խոսքով, ամբաստանյալները կարծես փակել են Հայկազ Բարսեղյանի բերանը, պահել ոտքերը. «Գնելն էլ գործիքով հարվածել է»:
Ըստ Դեվիրճյանի` ամբաստանյալներից երկուսը քննարկել են` Հայկազի դին կախել, թե նետել պատշգամբից, մեկն էլ ննջասենյակում լույսի տակ ինչ-որ բան էր գրում` ասելով, որ ցանկանում են դեպքը որպես ինքնասպանություն ներկայացնել:
Ամբաստանյալների պաշտպաններից մեկի հարցին, թե Տիգրան Դեմիրճյանն ինչո՞ւ չի միջամտել կատարվածին, երբ իր բնորոշմամբ` ծեծում էին Հայկազին, Դեվիրճյանը պատասխանեց. «Չգիտեմ` վախեցա…»:
Լուիզա ՍՈՒՔԻԱՍՅԱՆ
