Նախաճաշի, թեթեւ լանչի, երեկոյան՝ մի բաժակ գինու կամ գարեջրի հետ… այս ուտեստը ուղղակի փրկություն է. ընդամենը 10-15 րոպե, եւ տեսքով ու համով գայթակղիչ լցոնած հացը ձեր սեղանին է:
Անհրաժեշտ մթերքները
Հաց- 1 հատ մեծ կամ 2 հատ միջին (ցանկալի է 1-2 օրվա բատոն, բագետ, չիաբատա տեսակի, շատ լավ կստացվի նաեւ սովորական «քարի» հացով կամ «բուխանկայով»)
Ձիթապտղի յուղ- 3-4 ճաշի գդալ
Կարդացեք նաև
Թարմ կանաչի ըստ ճաշակի, օրինակ՝ համեմ, մաղադանոս, կարող է լինել նաեւ անանուխ կամ սամիթ, թարխուն- 5-6 ճյուղ
Չորացրած կանաչիներ՝ ուրց, ծիթրոն, հազրեվարդ, անանուխ՝ ցանկացած սուր համով ձեր նախընտրած կանաչին- 1 ճաշի գդալ
Աղ, սեւ եւ կարմիր աղացած պղպեղներ- ըստ ճաշակի
Քերած պինդ պանիր (ցանկալի է պարմեզան, բայց կարելի է փոխարինել որեւէ այլ պինդ պանիրով)- 3-4 ճաշի գդալ
Պատրաստման եղանակը
Լվացած, լավ չորացրած կանաչին մանր կտրատել, լցնել թասիկի մեջ: Ավելացնել մնացած մթերքները՝ չորացրած կանաչիները, քերած պանիրը, համեմուքները, նաեւ ձիթապտղի յուղը, լավ խառնել:
Հացի վրա կտրվածքներ անել՝ վանդակի տեսքով: Լցոնը զգուշությամբ մտցնել կտրվածքների մեջ: Եթե կարիք զգաք՝ վերջում 1-2 ճաշի գդալ ձեթ էլ ցողեք հացի վրա:
Լավ փաթաթեք փայլաթիթեղի մեջ եւ դրեք նախապես 200 աստիճան տաքացրած ջեռոցը՝ 10-12 րոպեով: Մատուցեք տաք վիճակում:
Բարի ախորժակ:
Պատրաստեց Մելանյա Բարսեղյանը
«Առավոտ»
28.01.2017
