Տոնական սեղանների համար շատ հարմար, նաեւ` շատ համեղ նախուտեստ` հավկիթով եւ ձողաձկան լյարդով (печень трески): Նկատենք, որ ձողաձկան լյարդը պահածոյացվում է` առանց ջերմամշակման ենթարկվելու եւ պահպանում է գրեթե բոլոր օգտակար տարրերը, որ կան այդ համեղ մթերքի մեջ: Ձողաձկան լյարդը վիտամին A-ի եւ D-ի շտեմարան է, բացի այդ պարունակում է օգտակար ճարպաթթուներ, հանքանյութեր: Այնպես որ` այս նախուտեստը, բացի շատ համեղ եւ հագեցնող լինելուց նաեւ օգտակար է:
Անհրաժեշտ մթերքները
Ձողաձկան լյարդ- 1 տուփ
Հավկիթ- 6-7 հատ
Կանաչ սոխ- մի քանի ճյուղ
Թարխուն- մի քանի ճյուղ
Մանանեխ- 1 թեյի գդալ
Մարինացված մանր վարունգ – 10-12 հատ
Կապար (каперсы) (պարտադիր չէ)- 1 թեյի գդալ
Սեւ պղպեղ- ըստ ճաշակի
Թարմ կծու պղպեղ- կես հատ
Զարդարելու համար` հազարաթերթի տերեւներ
Պատրաստման եղանակը
Հավկիթները լվանալ, դնել կաթսայի մեջ, վրան սառը ջուր լցնել եւ դնել եփելու մոտ 15-20 րոպե: Ապա դնել սառը ջրի մեջ: Մաքրել եւ բաժանել երկու մասի:
Ձողաձկան լյարդը լցնել աղցանամանի մեջ, վրան ավելացնել ձվերի դեղնուցները, մանր կտրատած կանաչ սոխն ու թարխունի տերևները, վարունգը, կապարը, թարմ պղպեղը: Լավ խառնել, ավելացնել սեւ պղպեղն ու մանանեխը:
Պատրաստի աղցանով լցոնել ձվի սպիտակուցները:
Մատուցարանի մեջ տեղավորել հազարաթերթիկի տերեւները, վրան շարել լցոնած հավկիթները: Կախված սեզոնից` կարող եք այլ բանջարեղեն էլ դնել կողքը: Օրինակ, ինչպես այս նկարում է` կիսախաշ ծնեբեկ, որին այլ պարագայում կարող է փոխարինել թարմ կամ մարինացված վարունգը, խաշած կարտոֆիլը կամ գազարը, նեխուրի (քարավուզ) ձողիկները եւ այլն: Ի դեպ, աղցանի մեջ կարող եք նաեւ նեխուրի տերեւներ կամ ձողիկներ ավելացնել:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
