Վայոց ձորի անտառապատ տարածքում օգոստոսի 10-ին բռնկված հրդեհի մարման աշխատանքները երեկ վերսկսվել են վաղ առավոտից, հրդեհը չորրորդ օրն էր՝ չէր հաջողվում հանգցնել։
Օգոստոսի 10-ի երեկոյան ահազանգ էր ստացվել, որ Վայոց ձորի մարզում Արտավան գյուղում, այրվում է խոտածածկ տարածք։ Պարզվել էր, որ Մ-2 ավտոճանապարհի Վայք-Սարավան հատվածի 10-րդ կմ-ից դեպի Արտավան գյուղն ընկած տարածքում այրվում է խոտածածկույթ, բռնկվել է 14 էլեկտրասյուն, ինչի հետեւանքով հոսանքազրկվել էր Արտավան գյուղը։
Վտանգավոր օջախները հաջողվել էր մարել երկու օր առաջ՝ օգոստոսի 12-ին, երեկ հրդեհաշիջման աշխատանքները վերսկսվել են։
ՀՀ ԱԻՆ փրկարար ծառայության տնօրենի տեղակալ, փոխգնդապետ Արթուր Խաչիկյանից հետաքրքրվեցինք, թե հրդեհի առաջացման պատճառները որոնք են եւ ի՞նչն է նպաստել դրա տարածմանը։
– Առաջացմանը նախ նպաստում են վերջին շաբաթների ընթացքում հանրապետությունում բարձր ջերմաստիճանը, ինչի պայմաններում անտառապատ տարածքներում խոտը ամբողջությամբ չորացել, ծառերը ջրազրկվել են… վերածվում են մեծամասշտաբ հրդեհի։
– Պարոն Խաչիկյան, հիմա ի՞նչ փուլում են մարման աշխատանքները։
– Վայոց ձորը, կարելի է ասել, մեկուսացված է եւ հիմնական վտանգավոր օջախները կանխվել են, հիմա մանր օջախների մարման աշխատանքներն են ընթանում։
– Ռեսուրսները բավականացնո՞ւմ են։
– Ողջ ռեսուրսները Վայոց ձորում բավարարում են։ Հրդեհաշիջման աշխատանքներում ներգրավված են Զինված ուժերի ստորաբաժանումները, «Լիդիան Արմենիա» ընկերությունը, ոստիկանության ծառայողները, Փրկարար ծառայությունը։
– Պարոն փոխգնդապետ, խրամուղիները չե՞ն օգնել հրդեհաշիջմանը։
– «Լիդիան Արմենիայի» կողմից փորված խրամուղիները մեծ օգուտ են տվել, սակայն թեթեւ քամու դեպքում անգամ հրդեհը տարածվում է։
– Բուսածածկ ծառե՞ր են այրվել թե՞ խոտածածկ։
– Այսօրվա ոչ վերջնական տվյալներով վնասվել է 500 հա տարածք, որից 80 հա՝ անտառածածկ, սա վերջանական արդյունքը չէ, ընթանում են հաշվարկներ՝ իրական պատկերը ստանալու համար։ Մի խոսքով, նախնական այրվել է 500 հա տարածք։
Տաթեւ ԽԱՉԱՏՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
