ԱԺ-ում «Ծառուկյան» խմբակցության պատգամավոր Նաիրա Զոհրաբյանը աշխատանքի եւ սոցիալական հարցերի նախարար Արտեմ Ասատրյանին մի դեպք պատմեց, որ իրեն քիչ առաջ զանգել է մի քաղաքացի եւ ասել, որ իր ամուսինը մահացել է այսօր առավոտյան. «Թոշակը հանձնելուց ընդամենը րոպեների տարբերությամբ թոշակ հանձնող ձեր աշխատակիցը մտել է նրանց տուն ասել՝ քանի որ ինքը ընդամենը 15 րոպե առաջ մահացել է, մենք չենք կարող իրեն տալ այս ամսվա իր կենսաթոշակը: Եթե մարդը մահանար 5 րոպե տարբերությամբ, ստացվում է, որ ինքը իր թոշակը կստանար: Ես հասկանում եմ, որ կա օրենք, բայց այստեղ գործ ունենք հարցի բարոյական կողմի հետ, հատկապես, որ ընտանիքը ծայրահեղ չքավոր է»:
Նաիրա Զոհրաբյանն ասաց, որ քաղաքացու հասցեն, տվյալները կփոխանցի նախարարին:
Արտեմ Ասատրյանն էլ պատասխանեց, որ գումարը պարտադիր կվճարվի: Վճարողը «Հայփոստի» աշխատակիցն է: Կանխիկ վճարման համար ստացողի ստորագրությունը պարտադիր է եւ օրենքով սահմանված է դա: Բայց հետագայում կինը կարող է դիմել եւ այն կվճարվի:
Հռիփսիմե ՋԵԲԵՋՅԱՆ
