Շվեյցարիայի ամենահարուստ գործարարը ժամացույց կարտադրի նաև Գյումրիում

Aravot.am-ը Գյումրու քաղաքապետ Սամվել Բալասանյանից հետաքրքրվեց, թե կա՞ն գործարարներ, որոնք ոգևորված Հայաստանում տեղի ունեցած իշխանափոխությամբ, վստահելով նոր կառավարությանը, արդեն իսկ ցանկություն են հայտնել ներդրումներ կատարել Գյումրիում։

«Տեսեք այսօր ես խոսել եմ Սրմաքեշի ներկայացուցչի հետ (Վարդան Սրմաքեշը Շվեյցարիայի ամենահարուստ գործարարներից է,«Franck Muller» ընկերության համասեփականատերն ու գլխավոր տնօրենն է, որը Գյումրիում կառուցել, սակայն դեռ շահագործման չի հանձնել «Սաստեքս» տեքստիլ ֆաբրիկան, Ա․Ն․), մենք հիմա մի լավ ծրագիր ենք ուզում անել, որը կապվում է թե՛ աշխատատեղերի ստեղծման, և թե՛ բնակարանների հետ։

Գնել ենք մի շենք Բուլվարային թաղամասում, հին ռադիոգործարանի շենքերից մեկն է, երկրորդը՝ կողքի շենքը, պետական ստրուկտուրա է համարվում, ուզում ենք ժամացույցների տարբեր դետալների արտադրություն սկսել այնտեղ, որը կստեղծի աշխատատեղեր։ Պետք է լինի նաև համապատասխան հանրակացարան  կամ ինչ-որ սոցիալական բնակարաններ, որտեղ պետք է ապրեն այդ մարդիկ։

Այս ծրագրի շուրջ կար նախնական պայմանավորվածություն, իսկ այն տեղի էր ունեցել ոչ այս կառավարության օրոք։ Այսինքն` շարունակվելու է այս ծրագիրը։

Շարունակվելու է նաև «Սաստեքս»-ի հետ կապված ծրագիրը, գիտեք, որ նորից Սրմաքեշի ծրագիրն է: Ես հանդիպելու եմ Քրիստիանի հետ (խոսքը սփյուռաքահայ գործարար Քրիստիան Գելիջիի մասին է, որին և Վարդան Սրմաքեշը վստահել է տեքստիլ գործարանի կառուցումն ու շահագործումը, Ա․ Ն), որպեսզի այն 400 աշխատատեղը, որ խոստացել է, անպայման կարողանանք ունենալ։

Հիմա կան տարբեր առաջարկություններ․ ուզում են թեթև արդյունաբերության գործարան դնել Անի թաղամասում՝ մոտ 500 աշխատատեղով։ Հստակ պայմանավորվածություն դեռ չկա, հողի հարցերն ենք դեռ լուծում, որպեսզի մարդիկ գան ու այդ ծրագիրն իրականացնենք։ Բացի դրանից, երկու տեղից առաջարկություն կա Սևյանի անվան մշակութային պալատի հետ կապված, երկուսն էլ ուժի մեջ են, նորից մարդիկ դիմեցին, շուտով կգա համապատասխան խումբ, որպեսզի պայմանավորվածություն ձեռք բերենք, այդ ծրագիրն իրականացնենք», -ասաց Գյումրու քաղաքապետը։

Նունե ԱՐԵՎՇԱՏՅԱՆ

Լուսանկարը՝ Asbarez.com-ի