Երեւանի թիվ 2 ընտրատարածքից ԱԺ պատգամավոր ընտրված Հարություն Փամբուկյանը, որ համալրում է ֆինանսավարկային, բյուջետային եւ տնտեսական հարցերի հանձնաժողովը, դիմել է «Կայունություն» խմբին՝ անդամակցելու խնդրանքով։
Հայտնի է, որ վերջինս համախմբում է այն օրենսդիրներին, որոնք, ըստ էության, ամրապնդում են «Միասնության» թիկունքը։
Ա. ԱՐՇԱԿՅԱՆՆ ՈՒ Վ. ՍԻՐԱԴԵՂՅԱՆԸ ԳՈՐԾԸՆԿԵՐՆԵՐ ԵՆ
Կարդացեք նաև
ԱԺ պետաիրավական հարցերի հանձնաժողովի 32 անդամներից մեկն էլ «Հայաստան-Ռուսաստան-Բելառուս միություն» ժողովրդական նախաձեռնության նախագահ Աղասի Արշակյանն է, որն ավելի շատ հայտնի դարձավ ՀՀՇ նախագահ Վանո Սիրադեղյանի գործունեությունից տուժած քաղաքացիների հասարակական կազմակերպություն ստեղծելուց հետո։
Բանն այն է, որ այս պատգամավորը պետաիրավական հանձնաժողովում ստիպված է լինելու աշխատել նույն Վանո Սիրադեղյանի հետ, որի դեմ ինքը «խաչակրաց արշավանք» է սկսել։
ՔԱՂԱՔԱՊԵՏԻ ՊԱՇՏՈՆԸ ԹԱՓՈՒՐ Է
Նոր կառավարության կազմավորումից եւ Երեւանի քաղաքապետ Սուրեն Աբրահամյանի՝ ՆԳ նախարար նշանակվելուց հետո մայրաքաղաքն արդեն մեկ-երկու շաբաթ է մնացել է առանց քաղաքապետի։ Պաշտոնը, անշուշտ, առանցքային նշանակություն ունի, ու, թերեւս, այդ է պատճառը, որ նոր քաղաքապետի նշանակման հարցը շարունակում է առկախ մնալ։
Մինչեւ վերջերս համառ շշուկներ էին շրջում, թե Երեւանի քաղաքապետի թափուր պաշտոնի համար երկու թեկնածուներ կան՝ Ալբերտ Հերոյան ու Վահան Զատիկյան, որոնք, ըստ մեր աղբյուրների, պայքարում են այս պաշտոնում նշանակվելու համար։ Որպես Մալաթիա-Սեբաստիա համայնքի թաղապետ Վ. Զատիկյանն արդեն հայտնի է մայրաքաղաքի բնակիչներին, եւ նա կարող էր անգամ լուրջ հավակնորդ լինել։
Սակայն վերջերս հենց պարոն Զատիկյանից տեղեկացանք, որ իր թեկնածության մասին որեւէ խոսք չկա, եւ տարածված լուրերը իրականությանը չեն համապատասխանում, իսկ թե ովքե՞ր են հավանական թեկնածուները՝ հայտնի չէ։ Թերեւս, վերեւներում ինչ-որ բան դեռ ճշտված չէ, իսկ թե էլի որքա՞ն ժամանակ Երեւանը քաղաքապետ չի ունենա՝ եւս հայտնի չէ։
ՆԱԻՐԱ ՄԱՄԻԿՈՆՅԱՆ
«Օրագիր»
