ՊԱՏՎԱՎՈՐ ՔԱՂԱՔԱՑՈՒՆ ԱՆՊԱՏԻՎ ԱՐԵՑԻՆ Կառավարության նիստում քննարկվել է Գորիսի քաղաքապետ Համլետ Մկրտչյանին աշխատանքից հեռացնելու հարցը։ Որոշում է կայացվել «Գորիսի պատվավոր քաղաքացուն» հեռացնել զբաղեցրած պաշտոնից։ Տարածքային կառավարման նախարար Լեոնիդ Հակոբյանը խիստ պրակտիկ մոտեցում է հանդես բերել եւ հենց տեղում արդեն քաղաքապետի թափուր տեղի ընտրությունների համար գումարի հարցն է բարձրացրել։ Իսկ նախագահ Քոչարյանն էլ փայլել է իրատեսությամբ. «Բա որ նորից ինքը վերընտրվի՞»։ Այդ պահին Սյունիքի մարզպետի նյարդերը տեղի են տվել. «Էդ ժամանակ ինձ գործից կհեռացնեք»։ Պատկերացնո՞ւմ եք, որքան լարված պայքար է սպասվում Գորիսում։ ՌՈԲԵՐՏԸ ԼԵՎՈՆ ԿԴԱՌՆԱ՞… Ըստ ակադեմիկոս Ռաֆայել Ղազարյանի՝ «Ի պաշտպանություն ԼՂՀ-ի» կազմկոմիտեի երեկվա հրավիրված կոնֆերանսում ունեցած ելույթի՝ ժամանակին Արեւմուտքը շահագրգռել էր Լեւոն Տեր-Պետրոսյանին, ընդ որում՝ «անձնապես», որ նա համաձայնվի Ղարաբաղի գործարքին։ Ակադեմիկոսը ոչ մի կերպ չէր ուզում հավատալ, որ այսօր նույն աշխատանքներն Արեւմուտքը տանում է Ռոբերտ Քոչարյանի հետ. «Չեմ կարծում, որ Ռոբերտ Քոչարյանն էլ Լեւոնի նման ստիպված կլինի հեռանալ»,- հույսը չէր կորցնում պրն Ղազարյանը։ ԱՐԱՐԱՏԻ ԵՐԿՐԱՊԱՀՆԵՐԸ ԴԺԳՈՀ ԵՆ ԵԿՄ-ին մոտ կանգնած մեր աղբյուրները պնդում են, թե արդեն մի քանի ամիս կազմակերպության Արարատի մարզի մասնաճյուղը, ըստ էության, որեւէ առնչություն չունի ԵԿՄ-ի հետ։ Հայտնի է, որ Արարատի երկրապահները դեռ մի քանի ամիս առաջ հրապարակայնորեն դժգոհություն էին հայտնել ԵԿՄ-ի ղեկավարների պահվածքի առիթով։ Նույն աղբյուրները վստահեցնում են, որ արարատցի երկրապահները չեն մասնակցում ԵԿՄ որեւէ նախաձեռնության, թեեւ կազմակերպությունից անջատվելու մասին հայտարարություն չեն արել։
