«Իրավունք եւ միաբանություն» դաշինքի ներսում խմորումները լրջանում են։ Նախկինում էլ լուրեր կային, թե դաշինքում խոսակցություններ կան Աղասի Արշակյանին դաշինքից հեռացնելու մասին։ «Իրավունք եւ միաբանություն» խմբակցության նախագահի պաշտոնից Արտաշես Գեղամյանին հեռացնելու թեմայով ձայները հավասար են բաշխված՝ 3/3։ Սակայն դեռեւս Աղասի Արշակյանը չի կողմնորոշվել՝ ո՞ր կողմ անցնի՝ սեպարատ բանակցություններ վարող, անկայուն Գեղամյանի՞, թե՞ «մաքուր ձեռքերով» Հրանտ Խաչատրյանի։ Ա. Արշակյանն առայժմ փորձում է հաշտարարի դեր կատարել։
ԴՈՒՔ ԴԱՐՉՆԱԳՈ՞ՒՅՆ ԵՔ
ՀԺԿ նախկին քարտուղար Հմայակ Հովհաննիսյանը հաճախ է ՀԺԿ ներկայիս քարտուղարներին անվանում «դարչնագույն ուժեր»։ Նրանցից մեկից՝ ԱԺ փոխնախագահ Գագիկ Ասլանյանից «Առավոտը» հետաքրքրվեց, թե ինքն իրեն դարչնագույն ուժ համարո՞ւմ է։ «Սա արդեն անլուրջ է,- պատասխանեց պրն Ասլանյանը։- Եվ այդ մասին լուրջ խոսելն անլրջություն կլիներ»։
Կարդացեք նաև
ՀԱՆԴԻՊԵՑԻՆ ՄԵԿՄԵԿՈՒ
Երեկ կրկին հանդիպեցին ՀԺԿ նախագահ Ստեփան Դեմիրճյանը եւ ՀՀ վարչապետ Անդրանիկ Մարգարյանը։ Ստիպված ենք կրկնել, որ հանդիպման ընթացքում քննարկվեցին ՀԺԿ-ՀՀԿ հարաբերություններին, «Միասնություն» դաշինքի լինել-չլինելուն, կառավարության պատասխանատվությունը կիսել-չկիսելուն առնչվող հարցեր։