ՄԱՀԱՓՈՐՁ ՊԵՏՐՈՍ ՄԱԿԵՅԱՆԻ ԴԵՄ Հունիսի 24-ի լույս 25-ի գիշերը, ժամը 2-ի սահմաններում մահափորձ է կատարվել ընդդիմադիր դաշտում գործող «Ժողովրդավարական Հայրենիք» կուսակցության նախագահ Պետրոս Մակեյանի դեմ։ Վերջինս, բարեբախտաբար, չի տուժել, եթե, իհարկե, չհաշվենք, այն ծանր շոկային վիճակը՝ որում երեկ նա գտնվում էր։ Դեպքը տեղի է ունեցել Փանիկ գյուղում՝ Պ.Մակեյանի տանը։ Նրա եղբոր պատմածով, ՏՏ տեսակի ատրճանակից մեկ կրակոց է արձակվել Պ.Մակեյանի աշխատասենյակի ուղղությամբ, ուր նա աշխատելիս է եղել։ Միայն երջանիկ պատահականությամբ գնդակը չի դիպել կուսակցության նախագահին։ Մենք չենք շտապում գնահատական տալ տեղի ունեցածին, առավել եւս, որ դեռեւս չենք զրուցել հենց պարոն Մակեյանի հետ։ Հիշեցնենք միայն, որ, հատկապես ներքաղաքական լղոզված դաշտում, վերջին շրջանում Պետրոս Մակեյանն ու նրա գլխավորած կուսակցությունը իշխող վարչախմբի, թերեւս, ամենաարմատական ընդդիմախոսն է։ Սեփ. լր.
