ԼՐԱԳՐՈՂԱԿԱՆ ՓՈՐՁ Արդարադատության նախարար Դավիթ Հարությունյանը երեկ հարցազրույց վերցրեց «Առավոտի» աշխատակցից՝ տեսնելով Մարգարիտ Եսայանի վիրակապված ձեռքը, նախարարը ձայնագրիչը գրեթե խլեց նրա ձեռքից եւ հարցրեց. – Որտե՞ղ եք կոտրել ձեր ձեռքը։ – Աշխատանքի վայրում։ – Իսկ ի՞նչ էիք անում։ – Ոտքս սահեց եւ ընկա։ – Իսկ ըստ լուրերի՝ ինչ-որ մեկը հարձակում է գործել ձեր վրա, դա ճի՞շտ է։ – Ոչ։ – Իսկ դա առնչություն չունի՞ «Հոկտեմբերի 27»-ի հետ կապված ձեր հոդվածներին։ – Դուք ավելի լավ կիմանաք։ Հարցազրույցը վարեց արդարադատության նախարար ԴԱՎԻԹ ՀԱՐՈՒԹՅՈՒՆՅԱՆԸ Հ. Գ. Եթե կադրային փոփոխությունների պատճառով Դավիթ Հարությունյանը գործազուրկ դառնա, «Առավոտը» սիրով հրավիրում է նրան աշխատանքի։