ԿՐԿՆՎՈՂ ՍՑԵՆԱՐ Սահմանադրական հանրաքվեն Հայաստանում կանցկացվի հավանաբար այս տարվա հունիս-հուլիս ամիսներին: Այս մասին երեկ Մամուլի ազգային ակումբում կազմակերպված հանդիպման ժամանակ հայտնել է ԱԺ փոխնախագահ Տիգրան Թորոսյանը: Ըստ նրա՝ ՄԱԿ խմբակցության տարբերակը չի ստանա պատգամավորների մեծամասնության հավանությունը: Տիգրան Թորոսյանը հույս է հայտնել, թե գիտակցելով երկրի զարգացման համար հիմնական օրենքի կարեւորությունը՝ ընդդիմությունը եւ լրատվամիջոցները հանրաքվեն չեն վերածի քաղաքական ակցիայի: ԱԺ փոխնախագահը քիչ հավանական է համարել հեղափոխությունը Հայաստանում: Նա նշել է, թե վրացական կամ ուկրաինական սցենարը Հայաստանում չի կրկնվի, քանի որ դրա համար երկրում չկան հիմքեր: Ըստ նրա՝ արեւմուտքի առանձին վերլուծաբաններ, կանխատեսելով Հայաստանում շուտափույթ «թավշյա» հեղափոխություն, մոռանում են, որ դրանք, որպես կանոն, կապված են լինում որեւէ ընտրական գործընթացի հետ: Հայաստանում մոտակա ընտրությունները սպասվում են 2007-ին եւ 2008-ին, իսկ ահա Ադրբեջանում խորհրդարանական ընտրությունները տեղի կունենան արդեն ընթացիկ աշնանը, այնպես որ՝ այդ վերլուծաբաններին անհրաժեշտ է չշփոթել Հայաստանն Ադրբեջանի հետ: ԱԺ փոխնախագահը թերեւս մոռացե՞լ է, որ 2005-ի աշնանը Հայաստանում էլ լինելու են ՏԻՄ ընտրություններ: Տիգրան Թորոսյանը նաեւ հայտնել է, որ 2005-ի ապրիլին ԵԽԽՎ-ում ենթադրվում է ղարաբաղյան խնդրի առնչությամբ ժամանակավոր հանձնաժողովի ստեղծում, որի կազմի մեջ կմտնեն նաեւ ԵԱՀԿ Մինսկի խմբի համանախագահող երկրներից խորհրդարանականներ: Նա հիշեցրել է, որ ԵԽԽՎ Լեռնային Ղարաբաղի վերաբերյալ բանաձեւը պարունակում էր դրույթ, ըստ որի՝ ԵԽԽՎ-ն կվերադառնա այդ խնդրի քննարկմանը 2006 թ. հունվարին: Եվ ստեղծվող ժամանակավոր հանձնաժողովի խնդիրն է լինելու տարվա ընթացքում հակամարտության կարգավորման գործընթացին հետեւելը: Սեփ. լր.
