Համեստությունը մի կողմ դնելով Արամ Կարապետյանը պնդում է՝ հայ քաղաքական կյանքում ինքը «նորություն» չէ «Մենք չենք կարող գործ վարել մի կուսակցության հետ, որը չենք կարողանում հասկանալ, թե որ դաշտում է»,- երեկ «Առավոտի» հետ զրույցում ասաց «Նոր ժամանակներ» կուսակցության նախագահ Արամ Կարապետյանը: Ուստի՝ կուսակցությունների, հատկապես ՕԵԿ-ի հետ բանակցությունները շարունակելու եւ հետագա զարգացումներում համագործակցությունը խորացնելու համար «մենք դրել ենք մի հարց՝ դուք ո՞ր դաշտում եք գտնվում: Եթե ՕԵԿ-ը մինչեւ վերջ հասկացել է, որ վիճակն իրոք վատ է, մեր կարծիքով, ճիշտ կլինի դուրս գա կոալիցիայից եւ դառնա ընդդիմություն: Կամ էլ՝ հայտարարի, որ ինքը մնում է կոալիցիայում եւ ստանձնում է ընդդիմություն-կոալիցիա բանակցություններ վարող ուժի դերը, որպեսզի երկրում արյունալի զարգացումներ չլինեն: Այսինքն՝ իշխանությունը մեզ՝ հեղափոխական ընդդիմությանը, բանակցային կողմ է տրամադրում»,- ասում է Արամ Կարապետյանը: «Հիմա մենք ուզում ենք հասկանալ, որ եթե ՏԻՄ ընտրությունները ազատ-արդար-թափանցիկ չլինեն, իսկ ես վստահ եմ, որ այդպիսին չեն լինելու, ո՞րն է լինելու ՕԵԿ-ի հաջորդ քայլը»,- հարցնում է մեր զրուցակիցը: Ինչ վերաբերում է «Ղարաբաղ-2»-ին պարոն Կարապետյանի անդամությանը, որը հերքել էին Ավետիք Իշխանյանը եւ Արշակ Սադոյանը. «Երբ «Ղարաբաղ» կոմիտեն ձերբակալվեց, ես շատ լավ հիշում եմ մարդկանց, որոնք «Ղարաբաղ-2»- ի պարտականություններն էին կատարում՝ Դավիթ Շահնազարյան, Ալիկ Արզումանյան, Շահեն Պետրոսյան, Վիտյա Այվազյան, Սամվել Շահմուրադյան, մի կին կար՝ Աիդա անունով, ազգանունը, ցավոք, չեմ հիշում: Անդամություն չունեին, բայց շատ մեծ աշխատանք էին տանում Մովսես Գորգիսյանը, Աշոտ Նավասարդյանը: Ապրիլի 24-ին այդ կառույցի կազմակերպած առաջին ակցիան էր, մի քանի շարասյուներով եկանք՝ անցնելով ոստիկանական շարասյունը եւ Մատենադարանում արեցինք առաջին հանրահավաքը՝ «Ղարաբաղ» կոմիտեի ձերբակալումից հետո: Այդ ժամանակ ես էլ եմ ելույթ ունեցել: Այդպիսով սկսվեց հանրահավաքների նոր շարքն ու պայքարի էտապը: Ավետիք Իշխանյանը դրա ակտիվ մասնակիցն էր, կոմիտեի անդամ ինքն էր, թե՞ իր փոքր եղբայրը… Հիշում եմ Շահեն Պետրոսյանի Կիլիկիա թաղամասում գտնվող տան առաջին հավաքը, որտեղ խմվում էր երկու մեծ Մանուկյանների կենացը՝ 18 թվականին Հայաստանի վարչապետ Արամ Մանուկյանի եւ Վազգեն Մանուկյանի՝ որպես ազգային շարժման իդեոլոգի: Արշակ Սադոյանին չեմ հիշում Հայոց համազգային շարժումը, որպես այդպիսին, ձեւակերպելու գործընթացում, երբ մեզ անատոմիկումի մոտից ցրեցին, եւ մենք դա արեցինք կարծեմ Հնէաբանության ինստիտուտի դահլիճում, 53-55 մարդ էր ստորագրել: Թող ինձ ներվի, բայց Սադոյանին չեմ հիշում, ժամանակ շատ է անցել: «Ղարաբաղ-2»-ի ստրուկտուրան այդ էր, հետո թե այն փոխվել է եւ ովքեր են իրենց համարում նրա անդամներ՝ չեմ վիճում: Ես իմ կյանքում երբեւէ սուտ չեմ խոսել, հատկապես նման հարցերում, որոնք շատ հեշտ ստուգվող բաներ են: Էլ չեմ ասում Մոսկվայում կատարած այն տիտանական աշխատանքը՝ ցույցեր կազմակերպելու առումով, Համբարձում Գալստյանի եւ Վանո Սիրադեղյանի այցելություններից հետո: Այսինքն՝ ես ուզում եմ մեկ անգամ, համեստությունը մի կողմ դնելով, հանրությանը տեղեկացնել, թե ուր էի ցուրտ ու մութ տարիներին: Ես նորություն չեմ հայկական քաղաքական դաշտում»: ՆԵԼԼԻ ԳՐԻԳՈՐՅԱՆ Հ. Գ. Նոր Հաճնում Արամ Կարապետյանը հայտարարել էր, որ ինքը Մոսկվայում եղել է ՀՅԴ բյուրոյի քաղաքական պատասխանատուն եւ գրասենյակի գործադիր տնօրենը, Ռուս-հայկական համագործակցության հիմնադրամի հիմնադիրներից: Մեր նախորդ համարում, թյուրիմացաբար, հրապարակել էինք, թե իբր նա եղել է ՀՅԴ բյուրոյի անդամ:
