Երեւանի ընդհանուր իրավասության քրեական դատարանում Մուշեղ Արամյանի նախագահությամբ շարունակվեց Փարաքարի համայնքապետ Վալոդյա Գրիգորյանի եւ ոստիկանության աշխատակից Կարեն Աբրահամյանի գործով հիմնական դատալսումների փուլը, որի ընթացքում հարցաքննվեց մեղադրյալներից Գեւորգ Հարությունյանը։
Վալոդյա Գրիգորյանի շահերը ներկայացնող փաստաբանը փորձեց հարցադրումներով մեղադրյալի օգնությամբ ճշգրտել 2025 թվականի սեպտեմբերի 23-ին տեղի ունեցած սպանությանը նախորդող եւ հաջորդող իրադարձությունների ժամանակագրությունը եւ մեղադրյալի հնարավոր մասնակցությունը։
Մասնավորապես, հարց հնչեց, որ մյուս մեղադրյալի՝ Նարեկ Օհանյանի տան բակում հայտնաբերվել է հեռադիտակ, «բարսետկա», բենզինով լցված շիշ եւ այդ բոլորի դատագենետիկ փորձաքննությամբ հայտնաբերվել են Գեւորգ Հարությունյանին համընկնող հատկանիշներ։ Նրբությունն այն է, որ Գեւորգ Հարությունյանը իր ցուցմունքներում ընդունել է ու դատարանի դահլիճում էլ հաստատեց, որ «բարսետկան» իրենն է եւ ինքն օգտագործել է, սակայն իր առնչությունը հեռադիտակի, դրա կապիչի եւ բենզինով լցված շշի հետ ժխտում է; Փաստաբանը հետաքրքրվեց, թե նրա կարծիքով այդ դեպքում ինչպե՞ս կարող էին դրանք իրար հետ հայտնվել մի վայրում՝ Նարեկ Օհանյանի տան բակում, առավել եւս, որ ըստ նրա ցուցմունքի, ինքը «բարսետկան» մոռացած է եղել համայնքի տարածքներից մեկում, որը հետու է մյուս մեղադրյալի տնից։
Գեւորգ Հարությունյանը հարցին պատասխան տալ չկարողացավ՝ նշելով, թե պատկերացում չունի։ Սակայն բավականին հետաքրքիր բացահայտումներ արեց արդեն երկրորդ անգամ Էջմիածնի ոստիկանությունում տեղի ունեցածի մասին։ Մասնավորապես, որ իր հարցաքննությանը ներկա են եղել նաեւ հանրապետության բարձրաստիճան ոստիկաններ, որ այնուհետեւ իրեն փորձել են համոզել, որ կեղծ ցուցմունքներ տա, ի վերջո, ստիպել են ընտանիքի անդամների անվտանգության դիմաց ինքնախոստովանական ցուցմունք գրել։
Կարդացեք նաև
Դատավոր Մուշեղ Արամյանն այստեղ մեղադրյալին տեղեկացրեց, որ իր ցուցմունքի որոշ հատվածներ իրենցից ներկայացնում են ենթադրաբար քրեական օրենսգրքով նախատեսված պաշտոնատար անձի կողմից արարքների վերաբերյալ տեղեկություն ու եւս մեկ անգամ հիշեցրեց սուտ մատնություն կատարելու համար պատասխանատվության մասին։
Աշոտ ՀԱԿՈԲՅԱՆ
