ՄԱՐԶԱԿԱՆ ԱՆՑՈՒԴԱՐՁ Հաղթանակ եւ պարտություն Օրերս Մոսկվայում կայացած պրոֆեսիոնալ բռնցքամարտի շոուի շրջանակներում Ռուսաստանի մայրաքաղաքը ներկայացնող Արման Սարգսյանը հանդիպեց ռումինացի Մարիան Լեոնդրալիուին: Հայ բռնցքամարտիկն ուներ բացահայտ առավելություն: Նրա դիպուկ եւ հուժկու հարվածների արդյունքում վնասվեց ռումինացու հոնքը, կոտրվեց քիթը եւ 5-րդ ռաունդում Մարիանը հրաժարվեց մարտը շարունակելուց՝ պատճառ բերելով նաեւ ձեռքի վնասվածքը: Արմանը պրոֆեսիոնալ ռինգում անցկացրել է ութ մենամարտ ու բոլորում էլ հաղթել է: Ընդ որում՝ չորսը նոկաուտով: Իսկ ահա միջին քաշային կարգում IBF-ի եւ WBC-ի վարկածներով միջմայրցամաքային տիտղոսների նախկին տիրակալ, նովոսիբիրսկցի Սերգեյ Թադեւոսյանը Ռուսաստանի չեմպիոնության համար միավորներով պարտվեց Կրասնոդարի ներկայացուցիչ Դմիտրի Պիրոգին: Մերոնք դրսում Սոչիի «Դագոմիս» առողջարանային համալիրում ավարտված շախմատի Ռուսաստանի պատանեկան ու երիտասարդական առաջնություններում մրցանակակիրների մեջ կան նաեւ հայ շախմատիստներ: Մինչեւ 18 տարեկան տղաների մրցակցությունում դասական շախմատում 2-րդ տեղը գրավել է Պենզայի մարզից Պողոս Նահապետյանը: Նա իր անվան դիմաց գրանցել է 7,0 միավոր եւ միայն լրացուցիչ ցուցանիշներով չի ճանաչվել հաղթող: Նույն տարիքային խմբի աղջիկների առաջնությունում նույնպես 7,0 միավորով 3-րդ մրցանակակիր է դարձել Տաթեւիկ Հայրապետյանը (Լիպեցկի մարզ): Համաձայն առաջնությունների կանոնակարգի, բոլոր տարիքային խմբերում հաղթողներն ու մրցանակակիրները աշխարհի ու Եվրոպայի պատանեկան եւ երիտասարդական առաջնություններում Ռուսաստանը ներկայացնելու իրավունք են ստացել: Իսկ ահա Իսպանիայի Սյուդադ-Ռեալ քաղաքում անցկացված «Villa de Canada de Calatrava» շախմատի միջազգային առաջին փառատոնում, որի ընդհանուր մրցանակային ֆոնդը 74 հազար եվրո էր, Ռաֆայել Վահանյանը համեմատաբար հաջող է հանդես եկել արագ շախմատի մրցաշարում: Նա 6,5 միավորով 177 մասնակիցների մեջ գրավել է 9-րդ տեղը: Մեր հանրապետության երկրորդ պատվիրակը՝ Կարեն Մովսիսյանը, 5,0 միավորով եղել է 56-րդը: Իսպանիայում տարբեր երկրների դրոշի ներքո հանդես են եկել հայ շախմատիստներ: Մասնավորապես, Ռուսաստանը ներկայացնող Սերգեյ Մովսիսյանը եւ Արմեն Տեր-Կարապետյանը համապատասխանաբար 6,5 եւ 4,0 միավորով հանգրվանել են 13-րդ եւ 89-րդ հորիզոնականներում, իսկ Ալեքսի Տեր-Կարապետյանը (Վրաստան) 4,5 միավորով գրավել է 79-րդ տեղը: Կրկին 109-րդն ենք Ֆուտբոլային ասոցիացիաների միջազգային միությունը՝ ՖԻՖԱ-ն, երեկ հրապարակեց ազգային հավաքականների վարկանիշային դասակարգման ապրիլ ամսվա ցուցակը, որում Հայաստանի ազգային հավաքականը 205 երկրների մեջ պահպանել է 109-րդ տեղը: Իսկ առաջին տասնյակն ըստ հերթականության կազմում են. 1. Բրազիլիա, 2. Չեխիա, 3. Հոլանդիա, 4. ԱՄՆ, 5. Իսպանիա, 6. Մեքսիկա, 7. Ֆրանսիա, 8. Պորտուգալիա, 8. Արգենտինա, 10. Անգլիա: Սկսեց հաղթանակով Մոնտե-Կառլոյում մեկնարկեց թենիսի «Masters Series Monte-Karlo presented by Rolex» միջազգային ներկայացուցչական մրցաշարը, որի մրցանակային ֆոնդը 2 մլն 82 հազ. 500 եվրո է: Առաջին շրջանում արգենտինահայ Դավիթ Նալբանդյանը 6:4, 6:4 հաշվով առավելության հասավ Բելգիայի ներկայացուցիչ Կսավյե Մալիսի նկատմամբ ու շարունակում է պայքարը: ԱՇՈՏ ՀԱԿՈԲՅԱՆ