Երեկ «Առավոտը» տարբեր տնտեսվարողներից ահազանգ ստացավ այն մասին, որ Հարկային տեսչությունը համատարած՝ 150 հազար դրամով տուգանում է Գյումրիի հացի արտադրամասի տերերին՝ անգամ ուշադրություն չդարձնելով վերջիններիս արտադրանքի ծավալներին կամ արտադրամասի մեծ կամ փոքր լինելուն: Միաժամանակ բողոքներ ստացվեցին նաեւ երթուղային տաքսու վարորդներից, որ հարկայինը սկսել է նրանցով եւս հետաքրքրվել՝ պահանջելով համապատասխան լիցենզիա: Պետեկամուտների կոմիտեի լրատվական ծառայության «փայլուն» աշխատանքի շնորհիվ՝ մեր օրաթերթին չի հաջողվում պարզաբանումներ ստանալ, թե ինչո՞ւ է հարկայինը տուգանում տնտեսվարողներին: Բանն այն է, որ արդեն 4-րդ օրն է, ինչ «Առավոտը» փորձում է հարցազրույց անցկացնել Գյումրիի հարկային տեսչության նորանշանակ պետ Ռաֆիկ Մաշադյանի հետ: Լրատվական ծառայությունից նախապես տեղեկանալով մեր հարցերին՝ խորհուրդ տվեցին սպասել իրենց զանգին: Իսկ երբ նրանց խորհրդին հետեւելուց հետո զանգ չստացանք, ինքներս զանգեցինք եւ ստացանք հետեւյալ պատասխանը. «Ճշտման փուլում է: Ձեր հեռախոսահամարը ունենք՝ կզանգենք»: Մինչ հարկայինի լրատվական ծառայությունը չի կողմնորոշվում՝ թույլատրի՞ «Առավոտին» տեղեկատվություն ստանալ, թե՝ ոչ, տասնյակ տնտեսվարողներ են տուգանվում՝ չիմանալով, թե ինչու: Թե ինչու է հենց այդ տուժած տնտեսվարողների վճարած հարկերի հաշվին՝ Պետեկամուտների կոմիտեն 5-6 լրատվականի աշխատակից պահում, եթե նրանք 4 օրվա մեջ ի վիճակի չեն անգամ հարցազրույց կազմակերպել՝ անհասկանալի է, մանավանդ որ, բոլոր պետական հիմնարկները պարտավորվել են կրճատել իրենց ծախսերը:
Նշենք, որ պետական ցանկացած կառույց պարտավոր է լրատվամիջոցին տեղեկատվություն տրամադրել, ինչը Պետեկամուտների կոմիտեն չի անում:
