Մուսուլմանական հանրությունը բողոք է ներկայացրել Մարդու իրավունքների եվրոպական դատարան՝ Օրենբուրգի շրջանի Բուգուռուսլանի դատարանի որոշման դեմ: Ըստ այդ որոշման, իսլամական 16 գիրք ճանաչվել է ահաբեկչական: «Գազետա.ռու»-ի տեղեկացմամբ, Ռուսաստանի մուսուլմանների հոգեւոր խորհուրդը հայտնել է, որ առաջիկայում դիմելու է ՌԴ նախագահին:
«Սեւ ցուցակում» ներառված են հրապարակումներ, գրքեր կամ ֆիլմեր, որոնք դատարանի կողմից համարվել են որպես ահաբեկչական նյութեր: Արգելված գրականության հերթական ցուցակը հրատարակվել է 2007 թ. դեկտեմբերին՝ «Ռոսիյսկայա գազետա»-ում: Դրանց թվում են 16 իսլամական գրքերից՝ «Իսլամական դավանանքի հիմունքներ», «Ալլահի օրենքների սահմանումը», «Իսլամն այսօր» եւ այլն:
«Հունվարի 21-ին ես դիմեցի Բուգուռուսլանի դատարան՝ գործի նյութերին ծանոթանալու համար,- ասում է փաստաբան Ռուստեմ Վալիուրինը,- հիմնավորելով, որ դատարանի որոշումները դիպչում են իմ եւ իմ վստահորդների իրավունքներին»: Սակայն դատարանը պարոն Վալիուրինին մերժեց: Այդ պատճառով էլ Վալիուրինը որոշեց դիմել ԵԴ:
Իրավաբանի կարծիքով, արգելված գրքերը «խախտում են անսահմանափակ շրջանակների անձանց իրավունքները»: ԵԴ գանգատում ասվում է, որ «խախտված է անհրաժեշտ տեղեկատվությունն առանց խոչընդոտի ստանալու իրավունքը», այդ թվում՝ «մտահղացումների, կարծիքների, նաեւ՝ նորությունների տարածումը»: «Հուսով եմ, որ Ռուսաստանի իշխանությունները խելամտություն կցուցաբերեն եւ կհամաձայնեն չեղյալ համարել դատական այդ անհասկանալի որոշումը: Կարծում եմ, որ մուսուլմանները կշահեն այս գործը ԵԴ-ում, քանի որ պարզ երեւում է՝ մարդու իրավունքների խախտումը եւ բոլոր մեղադրանքները, որոնք վերաբերում են իսլամական գրականությանը՝ անհեթեթություն են»,- նշել է մուսուլմանների շահերի ներկայացուցիչը:
Մուսուլմանները գտնում են, որ խախտվել են իրենց դատական պաշտպանության, արդար դատաքննության եւ տեղեկություններ ստանալու իրավունքները:
