![\"\"](\"https://www.aravot.am/2009/aravot_arm/April/17/p2.jpg\")
Բագրատաշենի շուկայի փակումից երկու տարի հետո փորձ է արվում կրկին հայ-վրացական սահմանում վերականգնել առեւտուրը: Նման մի շուկա բացել էր Բագրատաշենի բնակիչներից մեկը: Սակայն այստեղ առեւտրի պայմանները հարմար չէին, նեղվածք էր: Երբ Բագրատաշենի նախկին գյուղապետ Հովսեփ Օգումցյանը, Պտղավանում վարձակալությամբ տարածք վերցնելով, շուկա գործարկեց, այս շուկայի առեւտրականները, այդ թվում՝ Վրաստանի Մառնեուլի շրջանի ադրբեջանցիները, թողեցին այդ տարածքը եւ տեղափոխվեցին Պտղավան: Օգումցյանի տնօրինած շուկան գործում է ամեն կիրակի, այստեղ հիմնականում հագուստ եւ գյուղատնտեսական մթերք են վաճառվում: Բագրատաշենցի մեկ այլ գործարար էլ Բագրատաշենի մաքսակետի շենքի հենց հետնամասում տարածք է կահավորել եւ առաջիկայում հավանաբար որպես շուկա կգործարկի:
Սակայն բոլոր դեպքերում գործարկվող շուկաները նախկին՝ երկու տարի առաջ փակվածի առեւտրի մասշտաբները չունեն, քանզի մաքսային հսկողությունը խստացվել է, նվազել է Հայաստանի տարբեր շրջաններից այստեղ առեւտրի եկողների թիվը: Իսկ նորահայտ շուկաների պայքարում կհաղթի նա, ով «վերեւներում մարդ ունի» եւ ավելի հեշտ կլուծի մաքսային ու հարկային մարմինների հետ առաջացող խնդիրները:
