2008-ին «Բելավիա» ավիաընկերության «CRJ-100LR» ինքնաթիռը Երեւանում վթարի է ենթարկվել այն պատճառով, որ չի ախտահանվել հակասառեցնող լուծույթով։
Ըստ «tert. am»-ի, այդ մասին երեկ մամուլի ասուլիսում հայտնել է ավիաընկերության գլխավոր տնօրեն Անատոլի Գուսարովը։ «Վթարի պատճառն այն է, որ համակարգի արտադրողը բավականաչափ չի մշակել ինքնաթիռի պաշտպանողական համակարգը՝ հնարավոր սառեցման պայմաններում: Ինչպես ցույց են տվել մի շարք հետազոտություններ եւ փորձաքննություններ, ինքնաթիռը պետք է ախտահանեին հակասառեցման լուծույթով, դա կարող էր օգնել խուսափել միջադեպից»,- մեկնաբանել է ավիաընկերության գլխավոր տնօրենը: Միեւնույն ժամանակ, նա նշել է, որ այդ ժամանակ գործող տեխնիկական փաստաթղթերի համաձայն՝ ինքնաթիռի նման վերամշակման անհրաժեշտություն չի եղել։
Հիշեցնենք, որ նախորդ տարվա փետրվարի լույս 14-ի գիշերը «Բելավիա» ավիաընկերությանը պատկանող ինքնաթիռը, որն ուղեւորվելիս է եղել Երեւանի «Զվարթնոց» միջազգային օդանավակայանից դեպի Մինսկ, թռիչքի ժամանակ շեղվել է թռիչքուղուց, բախվել գետնին, որի հետեւանքով տեղի է ունեցել պայթյուն, ու ինքնաթիռը կիսվել է երկու մասի։
Վառվող ինքնաթիռից հաջողվել է տարհանել բոլոր տասնութ ուղեւորներին եւ անձնակազմի երեք անդամներին։ Նրանք ստացել էին տարբեր աստիճանի մարմնական վնասվածքներ։
