Բայց դա Հայաստանի ներկայացուցիչներին չի վերաբերում: Սերբիայի մայրաքաղաքում ընթացող ուսանողական համաշխարհային խաղերը մոտենում են եզրագծին: Ցավոք, մեր ուսանող մարզիկների մասնակցության մասին, ինչպես միշտ, լուր չունենք: Միակ տեղեկատվությունը, որ մինչեւ երեկ կար, թեքվանդոյում նվաճած բրոնզե մեդալն է՝ միակը: Իսկ քանի որ դառը փորձը ցույց է տալիս, որ հաջողության դեպքում ավետիսը վայրկյանների ընթացքում է հասնում Հայաստան, պիտի ենթադրել, որ Բելգրադում առայժմ մեզ ձախողումներն են ուղեկցում: Սպորտում ամեն բան հնարավոր է: Պատահում է, որ նույնիսկ օլիմպիական խաղերում այս կամ այն մարզաձեւում աշխարհի բացարձակ առաջատարը պարտվում է ինչ-որ մի նորելուկի, այն էլ՝ նախնական փուլում: Ու ոչ մի երկրում, բացի Հայաստանից, դրանից ողբերգություն չեն սարքում՝ որպես քավության նոխազ ինչ-որ մեկին անարգանքի սյունին գամելով: «Ունիվերսիադան» ավարտվում է: Ենթադրաբար, մեր մարզիկների մի մասն արդեն իրեն լավ կամ վատ դրսեւորել է: Բայց մեզ հետաքրքրող օրվա ինֆորմացիա այդպես էլ չկա, որքան էլ ինտերնետում փնտրում ենք:
Դրա փոխարեն, այլ երկրների լրատվամիջոցներից տեղեկանում ենք, որ «Ունիվերսիադայում» երկու թե երեք մարզիկ հոսպիտալավորվել է խոզի գրիպով հիվանդանալու պատճառով: Սակայն միանգամից ասենք, որ հիվանդությունը մեր հանրապետության պատվիրակությանը չի դիպել: Հիվանդացածները Ուգանդայից, Ավստրիայից եւ Արգենտինայից են:
«Ունիվերսիադայի» կազմակերպիչների տարածած պաշտոնական հայտարարության համաձայն, այդ մարզիկները Սերբիա ժամանել են արդեն վարակված վիճակում:
Մեկ այլ աղբյուր տեղեկացնում է, թե Բելգրադում արդեն գրանցվել է նոր հիվանդության 26 դեպք ու նշում նաեւ Ավստրալիայի, Կանադայի, Մեծ Բրիտանիայի եւ ԱՄՆ-ի անունները:
