Վրացիք էլ կոշիկ ունեն

Անցած կիրակի օրը, օգոստոսի 30-ին, անհայտ անձը կոշիկով հարվածել է Աբխազիային սահմանամերձ Գանմուխուրի գյուղ այցելած Վրաստանի նախագահ Միխայիլ Սահակաշվիլիի գլխին: News.ru-ն, վկայակոչելով վրացական «Ալիա» թերթը, փոխանցում է, որ միջադեպը տեղի է ունեցել այն պահին, երբ Վրաստանի նախագահը հեռուստաընկերություններին հարցազրույց էր տալիս: Հարվածողը, որը, ըստ թերթի, գտնվել է ոչ սթափ վիճակում, փորձել է փախչել, բայց Սահակաշվիլիի անվտանգության աշխատակիցները նրան բռնել են: Նույն աղբյուրի փոխանցմամբ, սակայն, Վրաստանի նախագահի հարցազրույցը հեռուստաընկերությունները հեռարձակել են հիշյալ դրվագը մոնտաժելուց հետո: Հիշեցնենք, որ քաղաքական բողոքի արտահայտման այս ձեւն առաջին անգամ «կիրառվել» է ԱՄՆ նախագահ Ջորջ Բուշի նկատմամբ՝ Իրաքում, անցյալ տարի, երբ տեղի լրագրողներից մեկը՝ Մունտադար ազ-Զայդին իր կոշիկը նետել էր նախկին նախագահի վրա: