Դպրոցներ եւ ջուր՝ Մարտունու գյուղերին

«Հայաստան» համահայկական հիմնադրամը տեղեկացնում է, որ 2009 թվականի հոկտեմբերից մեկնարկել են ԼՂՀ Մարտունու շրջանի Սոս գյուղի խմելու ջրի ներքին ցանցի կառուցման եւ չգործող հին ջրամբարի վերանորոգման աշխատանքները: Արդեն պատրաստ է 7,6 կիլոմետր ներքին ցանցը, իսկ այս ամիս կսկսվի հին ջրամբարի վերանորոգման եւ բաժանարար հորերի կառուցման աշխատանքը:
Սոս համայնքի ղեկավար Իգոր Ղահրամյանի խոսքով՝ իրենք օգտվում են համայնքի միակ ջրհորից, որը քարուքանդ վիճակում է, իսկ ջուրը պիտանի չէ խմելու համար: «Ջուրը գյուղացուն հողի հետ կապող ամենաամուր օղակն է, եւ միայն ջուր լինելու դեպքում գյուղացին կարող է մտածել կենցաղային իր մյուս խնդիրների մասին»,- ասում է գյուղապետը:
2009-ին հիմնադրամը ջրամատակարարում է ապահովել շրջանի Բերդաշեն եւ Սպիտակաշեն գյուղերում, իսկ Գիշի եւ Ճարտար գյուղերում դպրոցներ են կառուցվում, Սպիտակաշենի նոր դպրոցն արդեն հանձնվել է շահագործման:
«Մեր մարդասիրական գործունեության հիմքում Արցախի բնակչության համընդհանուր բարեկեցությունն է, սակայն հատուկ ուշադրություն ենք դարձնում համայնքների ջրամատակարարմանն ու երեխաներին առնչվող ծրագրերին»,- հայտարարել է «Հայաստան» համահայկական հիմնադրամի Ֆրանսիայի տեղական մարմնի ատենապետ Պետրոս Թերզյանը: