Այսօր Երեւանի պետական տիկնիկային թատրոնում կկայանա հանդիպում լրատվամիջոցների հետ, որին կհաջորդի «Նա/Նե» ամենամյա լրագրողական մրցույթի 2009թ. արդյունքների ամփոփումը եւ մրցանակների հանձնման հանդիսավոր արարողությունը: Կարեւորելով լրատվամիջոցների դերը եւ նշանակությունը հասարակական կարծիքի եւ երեւույթների ձեւավորման գործում՝ Բրիտանական խորհուրդը՝ իր «Wo/men in Politics» ծրագրի շրջանակներում, եւ ԵԱՀԿ երեւանյան գրասենյակը արդեն երկրորդ տարին է՝ անցկացնում են «Նա/Նե» ամենամյա լրագրողական աշխատանքների (հեռուստատեսային նյութ, տպագիր հոդված, առցանց հոդված, բլոգ հոդված, ռադիո նյութ, առեւտրային գովազդ) մրցույթը։
Ժյուրիի կողմից լավագույնը ճանաչված հեղինակները կպարգեւատրվեն արծաթե «Նա/Նե» մրցանակով, ինչպես նաեւ կստանան դրամական պարգեւ:
Միջոցառման պատվավոր հյուրերն են ԵԱՀԿ երեւանյան գրասենյակի ղեկավար՝ դեսպան Սերգեյ Կապինոսը, Հայաստանում Մեծ Բրիտանիայի եւ Հյուսիսային Իռլանդիայի Միացյալ Թագավորության արտակարգ եւ լիազոր դեսպան Չարլզ Լոնսդեյլը, ներկայացուցիչներ պետական կառույցներից եւ միջազգային կազմակերպություններից:
