Ինչպես եւ սպասվում էր, Ադրբեջանի ազգային հավաքականը չի ժամանելու Երեւան, որտեղ երկու շաբաթից մեկնարկելու է հունահռոմեական ըմբշամարտի աշխարհի գավաթի խաղարկությունը: Ադրբեջանական կողմն այդ մասին վաղուց էր հայտարարել: Բայց քանի որ հայտերի ներկայացման վերջնաժամկետը լրանում էր հունվարի 30-ին, մեր ֆեդերացիան, որը նաեւ աշխարհի գավաթի մրցաշարի կազմակերպիչն ու անցկացնողն է, ձեռնպահ էր մնում խնդրո առարկա հարցին վերջնական պատասխան տալուց: Երեկ հայտնի դարձավ, որ Ադրբեջանը չի փոխել որոշումը՝ այդ մասին պաշտոնապես տեղյակ պահելով մարզաձեւի միջազգային ֆեդերացիային, որը որոշել է փոխարինման հավակնորդ երեք երկրներից՝ Շվեդիայից, Դանիայից եւ Ուզբեկստանից նախապատվությունը տալ վերջինին: