ՀՅԴ պատգամավոր, ԱԺ Ֆինանսավարկային եւ բյուջետային հարցերի մշտական հանձնաժողովի փոխնախագահ Արծվիկ Մինասյանը երեկ «Արցախ» ակումբում անդրադառնալով Հայ ազգային կոնգրեսի «100 քայլ» ծրագրին՝ ասաց. «Շատ լավ բան է, երբ ծրագրային առաջարկ է ներկայացվում. դա պետք է խրախուսվի՝ անկախ նրանից, որ ես չեմ կիսում այն մոտեցումները, որոնք ներկայացվում են՝ սկսած նրանից, որ նման ծրագիրը պետք է առնվազն մեկ սերնդի կյանքի մոտեցումները ներկայացնի, այլ կերպ ասած՝ այն պետք է իր մեջ գոնե 20 տարվա կանխատեսումներ կամ ակնկալիքներ ունենա»: Նաեւ հավելեց. «Այդ ծրագրի առանձին մոտեցումներից սոցիալիզմի հոտ է գալիս, եւ մի քիչ ինձ համար զարմանալի է, որ ուլտրալիբերալ ուժն է նման մոտեցումներով հանդես գալիս»: Ըստ պրն Մինասյանի՝ լուրջ չէ այն բացատրությունը, թե դա հետեւանք է նրա, որ ՀԱԿ-ում կան նաեւ սոցիալիստական ուժեր, որոնց տեսակետներն էլ պետք է համադրվեին ծրագրում. «Չե՛մ կիսում այս տեսակետը, քանի որ բոլորս էլ հասկանում ենք, թե ՀԱԿ-ում սոցիալիստական անվան տակ գործող ուժերը, ըստ էության, ոչ մի կշիռ չունեն: Եվ նրանց կողմից պահանջը ոչ մի էական դերակատարություն չունի»: «100 քայլին» ՀՅԴ պատգամավորի մեկ այլ գնահատականն էր. «Այս ծրագիրն իր մեջ նաեւ էական պոպուլիզմի տարրեր է պարունակում, որոնք ես չեմ քննադատում, բայց որոնք կարիք ունեն ճշգրտման ու հստակեցման»: «Առավոտի» կեսկատակ դիտարկմանը, թե որպես սոցիալիստական ուժի ներկայացուցիչ՝ իրեն պետք է որ հաճելի լիներ ՀԱԿ-ի ծրագրի այդ հոտը՝ Արծվիկ Մինասյանն արձագանքեց ճշտմամբ, թե ՀԱԿ-ի ծրագրից ավելի շատ համայնավարական հոտ է գալիս:
Արտահերթ ընտրություններ անցկացնելու ՀԱԿ-ի առաջարկի մասին էլ նա ասաց. «Քիչ հավանական եմ համարում, բայց դա չի նշանակում, որ բացառում եմ: Բայց բոլորը, այդ թվում՝ այսօրվա իշխանության ու նաեւ առանձին դեպքերում էլ՝ մեր ընդդիմախոսները պետք է գիտակցեն, որ ո՛չ արտահերթ ընտրությունները, ո՛չ իշխանափոխությունը չպիտի ինքնանպատակ լինեն»: Եվ հարցրեց. «Եթե 2008-ին, ինչպես ընդդիմախոսներն ասում են, կեղծվել են ընտրություններն այս ընտրական համակարգի պայմաններում, ի՞նչն է երաշխավորում, որ արտահերթ ընտրություններում նույն բանը չի լինի»:
