3 տարի ժամկետով Սեւանա լճում կարգելեն ձկնորսությունը: Երեկ այս մասին լրագրողներին ասաց բնապահպանության նախարար Արամ Հարությունյանը՝ հայտնելով, որ նման որոշում կայացրել է ՀՀ կառավարությունը: Սա կառավարության ներկայացուցիչը բացատրեց ձկնապաշարները համալրելու ու վերարտադրություն ապահովելու նպատակով: Նա նաեւ ասաց, որ Սեւանա լճի ջրի մակարդակը, նախորդ տարվա համեմատությամբ, այս տարի 50 սմ-ով բարձրացել է: Այս տարվա ծրագրով նախատեսվել է մոտ 600 հա տարածքում մաքրման աշխատանքներ իրականացնել. «Միայն մոտ 450 հա մաքրման աշխատանքները կատարելու ենք կոնկերտ ջրի մեջ»: Կլինի նաեւ անտառվերականգնման ծրագիր: Ա. Հարությունյանը նշեց, որ այս տարի ընդլայնել են ուսումնասիրվող ձկնատեսակները. «Մոտ 7,5 միլիոն դրամի ծառայություններ ենք իրականացնելու բոլոր ձկնատեսակների, հատկապես՝ սիգի ու գեղարքունի իշխանի, էնդեմիկ ուսումնասիրություններ ենք անելու՝ կատարելով մեր պաշարների հաշվառումը»: Նա, անդրադառնալով ուրանի հանքավայրի շահագործման մասին պտտվող տեղեկություններին, ասաց, որ իրականացվում են ուրանի հանքավայրի արխիվային նյութերի ուսումնասիրություն. «Ուրանը իրենից վտանգ կարող է ներկայացնել միայն հարստացման ժամանակ, այսինքն՝ դեռեւս խոսել ուրանի հանքավայրի շահագործման մասին՝ վաղաժամ է, փաստաթղթային ուսումնասիրությունից ու գնահատումից հետո նոր պարզ կդառնա հետագա գործընթացների մասին»:
Պարոն Հարությունյանի հավաստմամբ, արդեն այս տարի կտպագրեն նոր Կարմիր գիրքը՝ նոր բուսատեսակների եւ կենդանատեսակների համալրմամբ:
