Մայիսի 6-ին Դիլիջանի տարածաշրջանի Թեղուտ գյուղում վերջին հրաժեշտն են տվել գյուղի 45-ամյա բնակիչ Դավիթ Ղուլինյանին: Նա Դիլիջանի երկաթգծի էլեկտրական ենթակայանում էր աշխատում: Պատահարի օրը Դավիթն աշխատավարձ է ստացել ու տուն ճանապարհվել: Գյուղի տարածքով հոսող գետակի հետիոտնի կամրջով անցնելիս ընկել է գետը եւ գլուխը խփել քարին: Թեղուտի գյուղապետարանից տեղեկացանք, որ վարարած գետը նրան 400-500 մետր ներքեւ է տարել: Վիրավոր Դավիթին գետից դուրս են բերել, տարել Դիլիջանի հիվանդանոց, սակայն Դավիթի կյանքը փրկել չի հաջողվել: Զարմանալի է, որ Հայաստանի փրկարար ծառայության ինտերնետային կայքի նորությունների բաժնում հաղորդագրություն կա միայն մայիսի 4-ին Աղստեւ գետը շրջված եւ Տավուշի փրկարարների կողմից գետից հանված ծառի մասին, իսկ զոհված թեղուտցու մասին` ոչ մի խոսք:
