Ուկրաինայում գործող Femen կազմակերպության ներկայացուցիչները հերթական անգամ իրենց բողոքի ձայնն են բարձրացրել ընդդեմ իրանական իշխանությունների՝ Սաքինե Աշթիանիին մահապատժի ենթարկելու որոշման: Հղում անելով ուկրաինական ԶԼՄ-ներին՝ tert.am-ը տեղեկացնում է, որ կիսամերկ ուկրաինուհիները անգլերեն եւ ուկրաիներեն «Կանանց մի սպանեք» գրությամբ ցուցապաստառով ներխուժել են Կիեւում իրանցիների կողմից կազմակերպված միջոցառման անցկացման տարածք: Իրանցի անվտանգության աշխատակիցները ստիպված են եղել իրենց հագուստով ծածկել աղջիկների բարեմասնություններն ու դուրս հանել դահլիճից:
Հիշեցնենք, որ մեկ շաբաթ առաջ նույն շարժման անդամները, բայց ոչ կիսամերկ, բողոքի ակցիա էին կազմակերպել Կիեւում Իրանի դեսպանատան առջեւ:
Իրանի իշխանությունները 2006թ. մահապատժի են դատապարտել երկու երեխաների մայր Սաքինե Մուհամմեդ Աշթիանիին ամուսնական անհավատարմության եւ ամուսնուն սպանելու մեղադրանքով: Որպես պատժամիջոց սահմանվել էր քարկոծումը, իսկ ավելի ուշ այն փոխարինվել էր կախաղանով։
