Արգենտինայում անհայտ անձինք գողացել են երկրի նախագահ Կրիստինա Կիրշների մերձավորարեւելյան շրջագայության համար նախատեսված գումարները: Այդ մասին տեղեկացնում է news.am- ը: Արգենտինայի նախագահի աշխատակազմի 44-ամյա աշխատակիցը, ով համակարգում է նախագահի այցելությունները, վերադառնում էր տուն, երբ հարձակվողներից մեկը նրա գլխին է դրել ատրճանակն ու հափշտակել պայուսակը: Հանցագործները դեպքի վայրից փախել են մոտոցիկլետով:
Զինված հարձակման արդյունքում գողացվել է 68 հազար դոլար եւ 17 հազար եվրո: Գումարները նախատեսված էին նախագահական օդանավի անձնակազմի եւ տրանսպորտային այլ ծախսերի համար: Աշխատակիցը կանխիկացրել էր գումարները եւ տուն էր վերադառնում թիկնապահի ուղեկցությամբ:
Կիրշների մերձավորարեւելյան շրջագայությունը պետք է սկսվեր հունվարի 13-ին: Արգենտինայի նախագահը պետք է այցելեր Քուվեյթ, Քաթար եւ Թուրքիա:
