![\"\"](\"https://www.aravot.am/2011/aravot_arm/March/4/p23.jpg\")
«Sports.ru» կայքէջի տարածած տեղեկատվության համաձայն, Օսլոյում ընթացող դահուկային սպորտի աշխարհի առաջնությունում չորս դահուկորդներ, արյան մեջ հեմոգլոբինի բարձր մակարդակի առկայության պատճառով, չեն ելել մեկնարկի: Նրանք են. Արթուր Եղոյանը (Հայաստան), Միխայիլ Սեմյոնովը (Բելառուս), Դենիս Վոլոտկան (Ղազախստան) եւ Ալեքսեյ Շվիդկիյը (Ուկրաինա): Այս մասին հայտարարել է ձմեռային մարզաձեւերի միջազգային միության (FIS) գլխավոր քարտուղարի օգնական Սառա Ֆուսսեկը:
Լուրը, հասկանալի է, մտահոգեց մեզ եւ կատարվածի մեկնաբանությունը ստանալու նպատակով անմիջապես զանգեցինք հանրապետության դահուկային սպորտի ֆեդերացիա: Գլխավոր քարտուղար Գագիկ Սարգսյանն «Առավոտին» ասաց հետեւյալը. «Արթուր Եղոյանը պետք է մասնակցեր 10 կմ դահուկավազքի որակավորման մրցմանը, որի մեկնարկից առաջ բոլոր դահուկորդներից փորձանմուշ է վերցվել: Մենք էլ ենք տեղեկացել, որ Արթուրի արյան մեջ հեմոգլոբինի պարունակությունը մի փոքր գերազանցել է թույլատրելի նորման: Սակայն վստահաբար կարող եմ ասել, որ դա ինչ-որ արգելված բան օգտագործելու հետեւանք չէ, այլ հեմոգլոբինի բնական բարձրացում: Հաճախ այդպես լինում է, երբ ծովի մակերեւույթից երկու հազար եւ ավելի մետր բարձրության վրա բնակվող մարզիկը իջնում է ավելի ցածրադիր գոտի: Այս երեւույթը նկարագրված է նաեւ ՎԱԴԱ-ի կանոնագրքում: Այնպես որ, Արթուրից դեռ երկրորդ անգամ փորձանմուշ պետք է վերցվի եւ միայն դրանից հետո վերջնական եզրահանգում արվի»:
