![\"\"](\"https://www.aravot.am/2011/aravot_arm/September/20/p6.jpg\")
Երեկ 20 միլիոն դրամով տուգանվել է լուծվող սուրճի ներկրման ոլորտում խոշոր ծավալներ ունեցող «Մոկոնաթ» ընկերությունը՝ գերիշխող դիրքի չարաշահման համար: Այս մասին հայտնում են ՀՀ տնտեսական մրցակցության պաշտպանության պետական հանձնաժողովից:
Հանձնաժողովի ուսումնասիրություններով բացահայտվել է, որ վերոնշյալ ընկերությունը տեւական ժամանակ լուծվող սուրճն իրացրել է խիստ տարբերակված գներով, իսկ որոշ դեպքերում էլ՝ անհիմն կերպով բարձրացրել է գինը: Հանձնաժողովը պարզել է նաեւ, որ մի որոշ ժամանակահատված էլ «Մոկոնաթը» գների կտրուկ իջեցման միջոցով փորձել է շուկայից դուրս մղել իր մրցակիցներին, այսինքն՝ ընկերությունն իրականացրել է դեմպինգ, ինչի արդյունքում էլ լուծվող սուրճի շուկայում կարողացել է զբաղեցնել գերիշխող դիրք՝ ներկրման ծավալներով դառնալով առաջատար: Հանձնաժողովի փորձագետները այս ընկերության վարքագծի հետ կապված բավականին ուշագրավ բացահայտումներ են կատարել: Մասնավորապես՝ համաձայն ընկերության կողմից հանձնաժողով ներկայացրած փաստաթղթերի, լուծվող սուրճի ձեռքբերման գինը կազմել է 820 դրամ, սակայն վաճառքը տեղի է ունեցել գնման գնից անհամեմատ ցածր արժեքով՝ 620 դրամով: Այս գործելաոճով շուկայում առաջատար դիրքերի հասնելով, ընկերությունը կտրուկ փոխել է իր վարքագիծը եւ վարել է հակառակ քաղաքականություն: Նույն 820 դրամով ձեռք բերված սուրճը վաճառել է քառակի թանկ՝ 3300 դրամով:
Փաստաթղթերի ուսումնասիրությունից պարզ է դառնում, որ լուծվող սուրճի շուկայում գերիշխող դիրք ունեցող ընկերությունը տեւական ժամանակ գործել է օրենքի ակնհայտ խախտումներով եւ գերշահույթներ կորզել սպառողներից:
Ի դեպ, ընկերության կողմից հանձնաժողով ներկայացված փաստաթղթերի ուսումնասիրությունից պարզվել է նաեւ, որ ապրանքի ձեռքբերման եւ վաճառքի գները ակնհայտորեն չեն համապատասխանում իրական շուկայական գներին, ինչի հետ կապված բոլոր նյութերն ուղարկվել են Պետական եկամուտների կոմիտե:
Նշենք, որ սա այն ընկերությունն է, որը զբաղվում է նաեւ երշիկեղենի արտադրությամբ: «Մոկոնաթը» մեկն էր այն ընկերություններից, որը գոմեշի միս էր ներկրում Հնդկաստանից ու այդ ժամանակահատվածում արժանացել էր ՀՀ վարչապետի նկատողությանը, քանի որ պարզվել էր, որ այդ ընկերությունները սատկած գոմեշի միս էին ներկրում:
