Հայաստանի Հանրապետական կուսակցության (ՀՀԿ) այսօր տեղի ունեցած տնտեսական կոնֆերանսին որպես հյուր մասնակցող Ռուսաստանի Դաշնության «Յեդինայա Ռոսիա» կուսակցության անդամ Իգոր Չեռնիշենկոն լրագրողների հետ զրույցում ե՛ւ իրենց երկրի, ե՛ւ մեր երկրի ընտրությունների մասին կանխատեսում արեց։ Նրա կարծիքով, իրենց երկրում այս տարի կայանալիք պետդումայի ընտրություններում կհաղթի իրենց կուսակցությունը, իսկ Հայաստանում գերիշխող դիրք կունենա ՀՀԿ-ն. «Այդ կուսակցության հետ խորհրդարանում կլինեն նաեւ «Բարգավաճ Հայաստան» կուսակցությունը եւ այլ ուժեր»։
Վարչապետ Տիգրան Սարգսյանն էլ համաժողովից հետո ճեպազրույցում հայտարարեց, որ իրենք մշտապես առաջնորդվել են համերաշխության ապահովման սկզբունքով, եւ ամեն ինչ արել են, որ այդ համագործակցությունը կայանա: Նա շեշտեց, որ ՀՀԿ-ն կարող էր միայնակ իշխանություն ձեւավորել, բայց ՀՀ նախագահը, հավատարիմ մնալով իր առաջադրած սկզբունքներին, նախապատվությունը տալիս է համագործակցությանը, ինչի հիման վրա ձեւավորվել է կոալիցիոն կառավարություն, որը գործում է կոալիցիոն փաստաթղթի մեջ ամրագրված սկզբունքների հիման վրա:
