Այս մասին այսօր Գյումրիի ժուռնալիստների «Ասպարեզ» ակումբում տեղի ունեցած մամուլի ասուլիսի ժամանակ հաստատեց 33-ամյա գործարար Արման Սահակյանը: Հիշեցնենք, որ նա պարենային ապրանքների և խմիչքների ներմուծմամբ զբաղվող «Սովռանո» ՍՊԸ-ի, ինչպես նաև «Պրեսս ստենդի» և մի շարք ԶԼՄ-ների`«Կապիտալ» բիզնես օրաթերթի, tert.am լրատվական կայքի հիմնադիրն է: Նա, ըստ էության, նոր մարդ է Գյումրիում, «Շիրակ» ֆուտբոլային ակումբը ձեռք է բերել անցած տարվա օգոստոսին, այժմ հսկայական ներդրումներ է կատարում՝ խաղադաշտն է կառուցում, թերեւս Գյումրիից ձայներ տանելու ակնկալիքով:
Հետաքրքիրն այն է, որ Արման Սահակյանը մեծամասնական կարգով առաջադրվելու է թիվ 34 ընտրատարածքում. ստացվում է, որ պայքարելու է ԲՀԿ Շիրակի մարզային կառույցի պատասխանատու, ԱԺ ամենաերիտասարդ պատգամավոր Մարտուն Գրիգորյանի դեմ: Արման Սահակյանը թեև անկուսակցական է, սակայն, ըստ շրջանառվող լուրերի, նրան սատարելու է Հանրապետական կուսակցությունը, խոսակացություններ են պտտվում, որ Գյումրու հանրապետական քաղաքապետ Վարդան Ղուկասյանն էլ պատրաստվում է նրան թև ու թիկունք լինել: Քաղաքապետը հատկապես ոգևորված է այն մտքից, որ գործարարը պատրաստվում է դեմ դուրս գալ Մարտուն Գրիգորյանին: Ինչպես հայտնի է` ԲՀԿ-ական պատգամավոր Մարտուն Գրիգորյանը անցած ՏԻՄ ընտրությունների ժամանակ իր թեկնածությունն էր առաջադրել Գյումրու քաղաքապետի պաշտոնում, որն էլ անչափ ծանր էր տարել Գյումրու քաղաքապետը` մինչև օրս չներելով նրան: Նշենք, որ Արման Սահակյանը 2010 թվականին արժանացավ «Գյումրու տարվա մարդ» կոչմանը: «Այո, պատրաստվում եմ իմ թեկնածությունն առաջադրելու, բայց այսօրվա ասուլիսը Շիրակ ֆուտբոլային թիմին է նվիրված, եկեք ֆուտբոլի մասին խոսենք, կլինի առիթ, էդ թեմայով ես ձեր բոլոր հարցերին կպատասխանեմ»,- ասաց ֆուտբոլային ակումբի տերը: Aravot.am-ի այն հարցին էլ` թե ով կլինի Արման Սահակյանի ընտրազանգվածը Գյումրիում, նա մեկ անգամ եւս խոստացավ այդ թեմայով առանձին ասուլիս հրավիրել:
Նունե ԱՐԵՎՇԱՏՅԱՆ
