ՀՀ ԱԺ ընտրության մասնակցելու ցանկություն ունեցող ՀՀ դիվանագիտական եւ հյուպատոսական ներկայացուցչությունների աշխատողների, նրանց ընտանիքների անդամների եւ դրսում աշխատող ՀՀ քաղաքացիների համար կկազմակերպվի էլեկտրոնային քվեարկություն: Նման դրույթ կա ՀՀ նոր ընտրական օրենսգրքում եւ ՀՀ կենտրոնական ընտրական հանձնաժողովն այսօր սահմանեց կարգը:
Սա առաջին փորձն է Հայաստանում: Ապագայում հնարավոր է նման քվեարկություն կազմակերպվի նաեւ Հայաստանի ներսում:
Համաձայն կարգի, Հայաստանի դիվանագիտական եւ հյուպատոսական ներկայացուցչությունների աշխատողների եւ նրանք ընտանիքի քվեարկելու իրավունք ունեցող անդամների ցուցակը ՀՀ արտաքին գործերի նախարարություն կներկայացվի քվեարկության օրվանից 50 օր առաջ, ԱԳՆ-ն կստուգի դրանք եւ ԿԸՀ կներկայացնի 41 օր առաջ, ԿԸՀ-ն երկօրյա ժամկետում կհրապարակի դրանք եւ ԱԳՆ-ին փակ ծրարներով կտրամադրի քվեարկողի անհատական ծածկագրեր, որոնք կուղարկվեն դրսի քվեարկողներին:
Կարդացեք նաև
ԿԸՀ նախագահ Տիգրան Մուկուչյանը ասաց, որ արվել է առավելագույնը ընտրության գաղտնիությունը, թափանցիկությունն ու անվտանգությունը ապահովելու համար:
Դրսի մեր քաղաքացիները պետք է քվեարկեն Հայաստանում քվեարկության օրվանից ոչ շուտ 9 եւ ուշ, քան 5 օր առաջ: Իսկ ահա նրանց քվեարկության արդյունքները ամփոփվելու են ընդհանուր քվեարկության արդյունքների հետ:
Արամ ԶԱՔԱՐՅԱՆ