www.parliament.am-ը Ազգային ժողովի պաշտոնական կայքի հասցեն է: Կայքում պետք է որ մեր քաղաքացիները տեղեկատվություն ստանան խորհրդարանի ու նրա գործունեության վերաբերյալ: Համենայնդեպս, ԱԺ նախագահ Սամվել Նիկոյանի ողջույնի խոսքում այդպես է նշված, եւ այդպես է հուշում նաեւ տրամաբանությունը: Սակայն պաշտոնական կայքը, որի աշխատանքների համար ծախսվել եւ ծախսվում են պետական ռեսուրսներ, գերազանցապես Հանրապետական կուսակցության ազդագիր է հիշեցնում:
Օրինակ, փետրվարի 15-ին, ԱԺ-ի պաշտոնական այդ կայքում օրվա նորությունների մեջ լուսանկարներ ու տեղեկատվություն են տարածել, թե ինչպես է ՀՀԿ խմբակցության ղեկավար Գալուստ Սահակյանը հանդիպել Ուկրաինայի դեսպան Իվան Կուխտային: Ավելին, ներկայացված է, թե ինչ մտքեր է հայտնել Գալուստ Սահակյանը` իրենց կուսակցության քաղաքական սկզբունքների մասին` ասելով, որ «առաջիկա խորհրդարանական ընտրությունները բարձր մակարդակով անցկացնելու վճռականություն» ունեն : Գալուստ Սահակյանը նաեւ դեսպանին վստահեցրել է, թե «Քաղաքական դաշտն ու մթնոլորտը Հայաստանում այնպիսին է, որ բոլոր քաղաքական ուժերը լիարժեք կարող են դրսեւորել իրենց հնարավորությունները»:
Նկատենք, որ «Ժառանգության» ղեկավար Րաֆֆի Հովհաննիսյանը նույնպես բազմաթիվ հանդիպումներ է ունենում տարբեր դեսպանների, պաշտոնյաների հետ: Ուստի հարց է առաջանում, թե ինչո՞ւ այդ հանդիպումները լուսաբանելու առաքելությունը www.parliament.am-ը չի ստանձնում:
Հռիփսիմե ՋԵԲԵՋՅԱՆ
