«Նախկին արտգործնախարարի մոտ դեռեւս նախարար եղած ժամանակներից բնավորության գիծ կար` անհաջող հայտարարություններ անել, հետո նույնքան անհաջող կերպով բացատրություններ տալ` վատ վիճակի մեջ դնելով եւ իրեն, եւ գերատեսչությանը»,- Aravot.am-ի հետ զրույցում ասաց ՀՀԿ մամուլի խոսնակ Էդուարդ Շարմազանովը` անդրադառնալով նախկին արտգործնախարար Վարդան Օսկանյանի` կոալիցիայի վերաբերյալ իր նախկին հայտարարության առիթով տված մեկնաբանություններին:
Հիշեցնենք, որ ի պատասխան լրագրողների հարցերի, Վարդան Օսկանյանն ասել էր. «Ես ասել եմ՝ այն, ինչ որ այսօր Հայաստանում կա` քաղաքագիտական իմաստով ֆորմալ է, բայց նույն զրույցում երբ հարցրել են` ինչու դուրս չի եկել, ասել եմ` այն, ինչին ես չեմ մասնակցել` չեմ կարող գնահատական տալ: Ես կոալիցիայի իմաստը բացատրել եմ զուտ քաղաքագիտական իմաստով, այսինքն, իրոք, թե այս տարիներին ինչ հարաբերություն է եղել կոալիցիոն անդամների մեջ, ես չեմ մասնակցել եւ չեմ կարողանա գնահատական տալ»:
Ըստ Շարմազանովի, փաստորեն, ժամանակներն Օսկանյանին չեն փոխել եւ որպեսզի ավելի տպավորիչ լինի, ՀՀԿ մամուլի խոսնակը նաեւ օրինակներ բերեց. «Դեռեւս 2007-ին նա ԱԺ-ում հայտարարում էր, որ ճանաչում է Կարսի պայմանագիրը, այնուհետեւ բավականին անհաջող բացատրություններ էր տալիս, թե ինչը նկատի ունի, ազատագրված տարածքներն անվանում էր «օկուպացված», հետագայում փորձելով արդարանալ, իրականում ավելի խճճելով իրավիճակը, հայտարարում էր, թե բանակցում է Թուրքիայի եւ Ադրբեջանի արտգործնախարարների հետ, խոսում էր ղարաբաղյան խնդրում Թուրքիայի ներգրավվածության մասին, այնուհետեւ դարձյալ անհաջող կերպով փորձում էր բացատրել, թե ի՞նչն է նկատի ունեցել: Այս ամենը մի բան են ցույց տալիս` նախկին արտգործնախարարը ոչինչ չի սովորել, եւ ոչինչ էլ չի մոռացվել»:
Նելլի ԳՐԻԳՈՐՅԱՆ
