Երկրից բացակայող քաղաքացիների փոխարեն քվեարկելու համար տպագրված «կես միլիոն» կեղծ անձնագրերի մասի՞ն ինչ կասեք։
Պատասխանելով «Հայոց Աշխարհ»-ի այս հարցին, ԿԸՀ նախագահ ՏԻԳՐԱՆ ՄՈՒԿՈՒՉՅԱՆԸ երեկ նշեց. «Գիտեք ինչ, ես իրավաբան եմ, եւ մի բան կարող եմ ասել. դրանք լուրջ մեղադրանքներ են, որովհետեւ եթե որեւէ մեկը նման արարք է իրեն թույլ տալիս, բնականաբար պետք է լինի պաշտոնատար անձ, իսկ պաշտոնական դիրքի չարաշահումը քրեորեն պատժելի արարք է։
Առանց հիմնավոր փաստերի մերկապարանոց նման մեղադրանքներ ներկայացնելը ոչ միայն իրավական` նույնիսկ զուտ մարդկային առումով է անթույլատրելի։ Եթե որեւէ մեկը տիրապետում է քրեորեն պատժելի արարքի կատարման հետ կապված որեւէ տեղեկության, պետք է պատշաճ կարգով անմիջապես` րոպե առաջ ներկայացնի իրավասու մարմիններին։
Հակառակ դեպքում` երբ չկա որեւէ փաստ, նյութական ապացույց, ցանկացած նման արտահայտություն ընդամենը մերկապարանոց մեղադրանք է, որը իր խորքում կարող է ունենալ ամենատարբեր դրդապատճառներ»։
«Հայոց աշխարհ»
