Ամերիկայի ամենաճանաչված ֆանտաստ գրողներից մեկը՝ Ռեյ Բրեդբերին, վախճանվել է այսօր՝ 91 տարեկան հասակում: Այդ մասին հաղորդում է Ամերիկայի Ձայնը:
Բրեդբերիին ճանաչում է բերել 1953 թվականին ստեղծված «451 աստիճան ըստ Ֆարենհեյթի» վեպը, որը պատմում է ապագայում ձևավորված մի հասարակության մասին, որտեղ գրքերի այրումը պետական քաղաքականության էր հասցվել: Բրեդբերիի կողմից սառը պատերազմով, հեռուստատեսության զարգացմամբ և գրքերի նկատմամբ սիրով ոգեշնչված վեպը էկրանավորվել է 1966 թվականին:
«451 աստիճան ըստ Ֆարենհեյթի»-ին հաճախակի նկարագրում են որպես գրաքննության չարիքի մասին պատմություն, սակայն ինքը Բրեդբերին ասել է, որ պատմվածքն իրականում հեռուստատեսության կողմից մարդկանց մեջ դեպի գրականությունն ունեցած հետաքրքրության ոչնչացման մասին է:
Իր ստեղծագործական կյանքի ընթացքում Բրեդբերին ընդհանուր առմամբ գրել է մոտ 30 գիրք և մոտ 600 կարճ պատմվածք, ինչպես նաև պոեմներ, պիեսներ ու սցենարներ:
Մարդկության կողմից Մարսում գաղութներ ստեղծելու փորձերի մասին պատմող՝ 1950 թվականին գրված «Մարսի տարեգրությունները» վեպը հեղինակին միջազգային ճանաչում է բերել և թարգմանվել ավելի քան 30 լեզվով: